محاكمة الريسوني فغيابو : دفاعو انساحب من الجلسة مرة اخرى والنيابة العامة رفضات الدفوع الشكلية

رفعات هيئة الحكم فقضية الصحافي المعتقل، سليمان الريسوني، الجلسة قبل لحظات، للبث فطلب السراح المؤقت وطلبات أخرى تقدمو بيها دفاعو، وغيتم البث فهذشي فنهاية الجلسة مع تحديد تاريخ الجلسة المقبلة.
ولليوم الخامس على التوالي، الريسوني ماحضرش للمحاكمة ديالو، بينما جا المشتكي، محمد آدم، وكلس بحال عادتو فالصفوف الامامية إلى جانب دفاعو.
وتقدمو دفاع الريسوني بطلب عارض للمحكمة قصد إحضار الريسوني، لكن المحكمة رفضات.
وناضت قربالة اليوم فجلسة المحاكمة، من بعد ما قرر القاضي تعيين محامين جداد للنيابة عن الريسوني، بعد انسحاب دفاع هذ الأخير فالجلسة الماضية، قبل ما ينتفضو المحامين وياكدو انهم ماسحبوش النيابة ديالهم فخطرة، لكن كانو انسحبو من الجلسة فقط احتجاجا على عدم إحضار الريسوني، وهكذا قررو حتى اليوم يغادرو قاعة المحاكمة.
وكانت هيئة الحكم، قررات، فالجلسة السابقة، تعيين محامين فإطار المساعدة القضائية، وتكليف نقيب المحامين فكازا بمهمة التعيين، بعد انسحاب هيئة دفاع الريسوني، غير وكان مازال ماجاو المحامين المعينين حديثا.
واليوم كان تعقيب ممثل النيابة العامة على الدفوع اللي تثارت، واللي علن الرفض ديالها كلها، ل"عدم جديتها"، كيف قالت.
ويتابع الريسوني بتهم هتك العرض بالعنف والاحتجاز فحق شاب.
ووصل الريسوني لليوم 93 من إضرابو عن الطعام، واليوم 8 من إضرابو عن السكريات، احتجاجا على رفض إحضارو للمحاكمة ومتابعتو فحالة سراح.