واحد مادار كمامة مادار تعقيم مادار لقاح محتارم تباعد اجتماعي ، همل گاع سبل الوقاية من كورونا ونهار جاتو بالضرورة راه نشرها حتى هو على الناس وملي كيدخل للانعاش ويموت يتسمى مات بالاهمال الطبي ماشي بالاهمال الذاتي

بعض المغاربة كيتخايلوا أن الأطباء والممرضين والتقنيين ورجال الامن الخاص وگاع طاقم السبيطار راهم ديال الهند ومحصنين من كورونا بشكل خارق ، وخاص ملي يمشي المصاب بكورونا خصوصا لي وصلاتو نوبة التلقيح وملقحش وجاتو كورونا وتزاد عليه الحال خاص غير يدخل مع باب السبيطار يدورو بيه جوج أطباء وشي عشرة فراملية ويبقاو مقابلينو ربعة وعشرين ساعة على ربعة وعشرين، والى موقعش هادشي ومات بكورونا كيسميوه مات بسبب الإهمال الطبي، واحد مادار كمامة مادار تعقيم مادار لقاح محتارم تباعد اجتماعي ، همل گاع سبل الوقاية من كورونا ونهار جاتو بالضرورة راه نشرها حتى هو على الناس وملي كيدخل للانعاش ويموت يتسمى مات بالاهمال الطبي ماشي بالاهمال الذاتي.
نهار جاتني كورونا انا نيت وطبعا بسباب الإهمال الذاتي وهو أنني مابقيت كندير لا كمامة لا تعقيم، فاش مشيت لسبيطار كوكار لقيت واحد السيكوريتي راجل كبير وقافز وسرابسي كيسميوه العلوي منظم الأمور مزيان وكيهدر مع الناس ويفهمهم ، السيد عندو فضل كبير في سير الأمور بسلاسة في قسم صحاب كوڤيد، فاش وصلاتني النوبة ودخلت لقيت واحد الولد تقريبا قدي في العمر سميتو معاذ هو المسؤول تما على التيست، الصراحة أنا ممتن ليه للمهنية والإنسانية والأدب والاحترام باش تعامل معايا والوقت لي عطاني في اجراء الفحوصات وكيفاش طمني على حالتي، وفواحد المشهد لقيت راجل كبير جا يدير كونطرول وكيشكر فمعاذ والدموع فعينيه وكيقوليه بفضلك وبفضل الله باش قدرت نفلت ودابا التنفس مزيان عندي والاكسجين في دم مخير، معاذ شفتو وهو كيدير ليا التيست غسل يديه شي تلاتة دالمرات وكذلك مع الناس وكمامتو طالعة ودابا وساعة يعقم يديه وغسلهم، فاش رجعت من بعد عشرام ندير التيست لقيت تقريبا الطاقم كلو تبدل بسباب ان اغلبيتهم جاتهم كورونا ابتداء من العلوي السيكوريتي لي في الباب ولي عوضو واحد الدري مقدرش يدير داك الدور وتربجات الدنيا والغوات والصداع وبان أن العلوي يقدر يكون كيشد اضعف صالير تما ولكن بلا بيه مستحيل تمشي الأمور بالسلاسة والتنظيم لي يسهل خدمة الطاقم الطبي، طبعا لقيت حتى معاذ مكاينش حيت جاتو كورونا كنتمنى يكون بيخير وعلى خير، ولقيت فرملية تعادات وعادات حتى واليديها كبار في العمر وجابتهم يدوزو.
وهادي يوماين ماتت فرملية حاملة في شهرها اللول في مراكش بكورونا، واخيب حاجة شفت هي مواطنين فيهم كورونا وشادين الصف باش ياخدو الدوا ومادايرينش الكمامة كتلقى الفرملي او الفرملية كيهدر معاه ويعاود باش يدير الكمامة ووالو، وحدة زماركية قاتليها الفرملية ديري كمامتك ردات عليها حنا كلنا فينا كورونا علاش نديرها، الأطقم الطبية والصحية لي فالسبياطارات ولي في الصفوف الامامية في مواجهة كورونا ابتداء من السيكوريتي لي في الباب مرورا بعمال النظافة والتقنيين وصولا للأطباء والممرضين، كاع الناس لي كيعامرو بحياتهم وحياة واليديهم واسرهم باش يعالجوا ويقابلوا، ولي خاص يفهموه بزاف ديال المغاربة هو أن الطاقم الطبي غير محصن ضد كوڤيد، وراه بحال لي كاين شهداء في الجيش دفاع عن الوطن راه كاين شهداء في قطاع الصحة ماتوا دفاعا عن الوطن من كوڤيد وخاصهم منا كل الاحترام والتقدير.