هادا وقت المنصوري فالبام. مراكشية عينها على عمودية مدينتها وكتحفي صباطها فالحملة والدق والسكات

حزب الاصالة والمعاصرة زمن وهبي مضروب بفليطوكس. امين عام جا لحزب كلشي عارف نشأتو وبغى يضحك على لمغاربة كلها. وهبي من عينة دوك اليسار اللي فشل فكلشي وركب علي التراكتور باش يعوض زمن الفشل. بحال هاد العينة بحال مالين الشكارة او الزرواليون نسبة الى مول مسيرة كازا الشهيرة ف2016 اللي ولات اسمها ولد زروال. اعيان همهم الحفاظ على مصالحهم. لكن فهاد الحزب كاينة عينة من السياسيين والسياسيات اللي آمنو بافكار مؤسسو. جيل ما عمرو دار السياسة. هاد الجيل ممكن يكون المنقذ لهاد الحزب.
فهاد الفئة كاينة فاطمة الزهراء المنصوري رئيسة المجلس الوطني للحزب. دعمات الياس العماري باش يوصل للرئاسة ومن بعدو دعمات حكيم بنشماش وبعدو دعمات الامين العام الحالي عبد اللطيف وهبي. بعد تجربة الياس اللي ربحو بنكيران فالانتخابات التشريعية ل2016 كان خاصو يجي دور المنصوري. الحزب اللي خسر فالاخير
اليوم هاد السياسية مرشحة التراكتور فالانتخابات الجماعية والتشريعية بدائرة المدينة. ناس مراكش كيعتابروها من القيادات النسائية. فالحقيقة لمغاربة كيعتابروها كذلك. كان دورها كبير وطفات شلى عوافي شعلات فالتراكتور. لعبات دور البومبي فأصعب لحظات الأزمة الي كانت غادي تقسم الحزب.
وبزاف ديال المراكشيين توحشو فترة فاطمة الزهراء المنصوري وهادشي لي غادي يخلي المرأة الانيقة الصارمة و"بنت مراكش" ترجع بقوة وتنافس على منصب العمودية، خصوصا انها ولات دابا من أبرز العيالات السياسيات فالبلاد و للي الكلمة ديالها مسموعة حيت عندها تجربة كبيرة وحكمة فالتدبير.
ومعولة فاطمة الزهراء المنصوري على الاف المراكشيين اللي كيعتبروا حصيلها متميزة خصوصا وان فالعهد ديالها تنظمات مراكش من حيت حركة السير وجودة البنيات وبزاف ديال المشاريع تدارت فمراكش .
ومعلوم ان المنصوري اول امرأة عمدة في تاريخ المغرب. بنت الشعبي اسماء كانت رئيسة مجلس بلدي الصويرة للي ما فيهاش نظام العمودية. مازال عند فاطمة الزهراء مستقبل سياسي. هي من مواليد سنة 1976 وبنت الراحل عبد الرحمان المنصوري باشا مراكش السابق، وعندها رصيد ثقافي مغربي ،حيت خذات أصول التربية من المدرسة المغربية فمراكش قبل ما تمشي تكمل قرايتها الجامعية ففرنسا فالحقوق اللي خلاها تكون محامية مهمة فمراكش.
ايلى كان الحزب غادي يدخل للحكومة المقبلة٬ فاحتمال ان المنصوري تاخد شي حقيبة وزارية كبير بزاف. يمكن هي البامية الوحيدة اللي يفكر فيها اي سياسي يبغي هاد الحزب٬ فحالة ما جاش فالرتبة الاولى٬ يتحالف معاه.