منير كيجي ل"كود": ما عندي علاقة بشريط شنگريحة اللي بغى يوهم الجزائريين عبر شيطنة المغرب واسرائيل و"الماك"

البارح بثات قناة عمومية بالجزائر "تحقيق" فيه باللي دولة من شمال افريقيا اللي هي المغرب، واسرائيل، عندهم مخطط لزعزعة امن واستقرار لبلاد بتنسيق مع قيادات من القبايل.
من الاسماء اللي راج اسمها فهاد المخطط هو الناشط الحقوقي والمدافع على علاقات طبيعية بين المغرب واسرائيل المغربي منير كيجي.
كيجي اكد فحوار مع "كود" انو بالفعل اتصلو بيه البارح عدد من الاصدقاء بما فيهم اصدقاء فالقبايل. هادو، يوضح كيجي ل"كود" صحاب ليهم هو يونس الميموني بحكم انو مصور مع مجندتين اسرائيليتين وكان صورة بحالها نشرها منير فصفحتو.
كيجي قال ل"كود" "اؤكد ان هاديك الصور اللي تبتات فديك المهزلة اللي دوزها التلفزيون الجزائري، ماشي ديالي. يمكن التاكد من هاد الشي بالرجوع الى صفحة يونس الميموني".
ويرى الناشط الحقوقي فحوارو مع"كود" ان النظام الجزائري تصطى وجهل بسباب "النخال اللي دايرو المغرب لمثل هذه الترهات". باللي كلها تجاهل، وهادالشي "كيزيد يؤزم نفسيا الجينرالات. راهم مجروحين من هاد التجاهل اللي عطاهم المغرب". وشدد فحوارو مع "كود" باش نميزو بين "النظام وبين الشعب الجزائري" للي وصفو ب: "ضحية ورهينة فيد جينرالات العسكر".
كيجي اللي عندو معرفة كبيرة بالقبايل. كيعرف زعماء الحركة وبسطاء السكان. مشى ليها شي 6 المرات، قال فحوارو مع "كود" باللي كيحس براسو عند خوتو باش كيكون تماك. واكد ان هاد التخربيق ما يمكنش يؤتر على العلاقات الانسانية.
كيجي رجع للتحقيق المهزلة، وقال فحوارو مع "كود" باللي شريط شنگريحة بغى يشيطن المغرب واسرائيل والماك. شيطنة هدفها، وفق نفس المصدر، التغطية على الازمة الحادة اللي كتهدد النظام كولو يطيح "المنظمات المالية المانحة دوليا تشير ان اقتصاد الجزائر يعاني ازمة حادة ويمكن ينهار فاية لحظة. هاد الشي علاش كنشوفو ان من اهداف عسكر الجزائر القضاء على الحراك ونسبيا قضاو عليه، ثم شيطنة حركة الماك واخا رئيسها ديما كيكرر باللي هي حركة سلمية عندها هدف سياسي هو استقلال منطقة لقيايل٬ ثم محاولة شيطنة المغرب واسرائيل.
وعليه جمعو الثلاثة بعد ما روجو مخططهم٫ وقالو راهم ب3 باغيين يزعزعو استقرار البلاد وامنها. خلقو هاد العدو الوهمي باش يرصو صفوف الجبهة الداخلية ضد هاد العدو. بغاو ينسيو الشعب فالازمات وقلبو على مخرجات ومتنفس وعلى هاد الشي خاص عدو خارجي لمشاكلهم، يشرح منير كيجي.
واضاف الناشط نقطة اخرى فحوارو مع "كود"، يتعلق الامر بعودة العلاقات المغربية الاسرائيلية. هاد العلاقات اللي غادية وتقوى وتشمل ميادين مختلفة، زعجات شنگريحة وسطاتو وسحبات البساط من تحت رجليه.