برلماني إسباني باغي يدير البوز باستغلال أزمتنا مع نظام عسكر الدزاير... حط سؤال على حكومة مدريد زعما علاش خلات بوريطة يسافر ف طائرة إسبانية ويختارق أجواء الجزائر! – وثيقة

طرح البرلماني الإسباني كارليس موليت كَارسيا، على حكومة بلادو سؤال باغي يدير بيه البوز، مستاغل فيه العلاقات الخايبة بين المغرب ونظام العسكر فالجزائر.
السياسي الصبليوني قال فسؤالو أن وزير خارجية المغرب، ناصر بوريطة، استعمل طيارة إسبانية باش يدوز من الأجواء الجزائرية في رحلته إلى رواندا، متساءلا كيفاش الصبليون يتورطو فهادشي وهوما عارفين مستوى تأزم العلاقات بين المغرب والدزاير؟
البرلماني قال فنفس السؤال (الغبي) واش الجزائر غاتحرك ضد المغرب بعدما تجيب خبار هاد "الانتهاك"؟
لكن اللي ماعرفوش هاد البرلماني "القافز" أن عسكر الجزائر منع غير الطائرات المغربية دوز من أجواءهم، ماشي المواطنين المغاربة، والدليل أن الطيارات التركية أو الإماراتية أو طائرات دول أخرى يوميا كيهزو مغاربة وكيدوزو فوق الأجواء الجزائرية بشكل عادي، ويبدو أنه ماعارفش أيضا اللي كيشملهم هاد القرار الدزايري هو شركات الطيران المغربية وباقي الطائرات المسجلة فالمغرب فقط.