واش الكاتب العام لمجلس النواب قريب يطير؟ ها كيفاش الطالبي العلمي كعا عليه بسبب صفقة الباركينگ والپريمات

انتقادات كثيرة توجهت للكاتب العام لمجلس النواب، نجيب خدي، اللي طول بزاف فهاد المنصب، هاد المرة جات من رئيس المجلس الطالبي العلمي.
الطالبي العلمي، حسب معطيات "كود" معجباتوش إدارة المجلس ولقاها ثقيلة وحتى الموظفين فحالة يرثى لها بحيث كيعيشو ظروف صعيبة ف الخدمة ومعندهمش امتيازات مقارنة مع مجلس المستشارين.
لي زاد كعا العلمي، هو التأخر الحاصل ف تشييد الباركينغ، بحيث هاد الصفقة لي تمت قبل سنوات فيها التخوفيش وفيها شبهات كثيرة، والغريب في الأمر أن المسؤول الأول على هاد الباركينغ لي تعطلو فيه هو الكاتب العام نجيب خدي.
الطالبي العلمي كان واضح ف مناقشة ميزانية مجلس النواب الجمعة الماضية، وهضر على قوة المؤسسة التشريعية وقال بلي ضروري تكون قوية بفرقها النيابية والأحزاب والموظفين والأطر، مضيفا بلي لا يعقل الموظف معندوش فين يحط طومبيلتو وملقاش باركينغ.
وشدد العلمي بالقول كاينا أمور خصها قرارات جريئة وتوفير الإمكانيات.
رئيس مجلس النواب سول نجيب خدي على الباركينغ، وخاطبو بندية "كاينا أمور خصها استعجال" ، في إشارة إلى أن هاد الباركينغ تعطلو فيه.
الموظفين كيتسناو الخير من الرئيس الجديد لمجلس النواب، وباغين الترقيات خصوصا وأنهم كيدير مجهود كبير ومضاعف مقارنة مع الغرفة الثانية. مع العلم ان الكاتب العام نجيب خدي اخير همو هو الموظف.
ايشار إلى ان عدد الموظفين الذين تمت ترقيتهم في الرتبة والترسيم خلال سنة 2021، بلغ 179 موظفا.