ها حوربش ايلى قدرتو تسدو علينا فراس العام. خاص لمغاربة يتحزمو باش يواجهو قرارات غبية بحال هاد الاشاعة اللي مطلوقة باللي من 23 دجنبر غادي يسدو بالليل

كاينة اشاعة مطلوقة ماشي بريئة باللي من 23 فهاد الشهر غادي ترجع حالة الطوارئ فالليل وتسد الدنيا من التسعود الليل حتى الخمسة الصباح. اشاعة لاعبة على نفسية كلشي. البارح فالريسطو. لا كليان لا الخدامة فالريسطو لا المسؤولين عليه ما كاين غير هاد الهدرة. شي كيقول: راه الحكومة قررات وقريب يعلنو عليه وشي كيقول مازال ما قرروش.
حنا ف"كود" سولنا مسؤولين فوزارات معنية بهاد القرار. حتى هما تالفين وكيرددو نفس الهدرة. تصورو فين وصلنا فالعبث. وشكون عارف. وعلاش مخليين الناس معلقة
بعيد على هاد الحالة النفسية اجيو بعدا واش كاين شي مبرر للسدان؟ والو ابدا. السدان يعني فقدان العقل ديال الحكومة وصافي. يعني التصطية. اللي كيتحكم فهاد الشي هي الحالة الوبائية. حالتنا مزيانة وبزاف. لا فعدد الحالات لا فالوفيات والاهم من هاد الشي كولو عدد الحالات اللي كاينة فالانعاش. اذن علاش هاد الشي.
هاديك العبارة الغبية اللي كتكرر "الحفاظ على المكتسبات" ما عندها مكان هنا. الحكومة سدات البلاد باش ما يدخلش "اوميكرون" وخرجات وزارة الصحة كتكذب علينا وكتقول راه لقيناه ولكن صنع مغربي". غباء ما بعدو غباء. ايلى كان مغربي راه خاص يكون عندو اسم اخر ماشي اوميكرون.
دابا خاص لمغاربة يعرفو كيفاش يدافعو على ريوسهم ايلى كان شي قرار غبي بحال هادا اللي كيروجوه. خاصهم يواجهو السدان بلا مبرر. خاصهم ينوضو ليه. قطاعات كثيرة كتاكل لعصا وزيد عليها وضعية نفسية فشي شكل.
خليو لمغاربة يحتافلو شوية. يدار هاد الشي فاحترام للتباعد. ولكن يدار. راه ما بقيناش نعرفو نشطو.
واياكم تسدو واياكم ديرو شي قرار يرجع عليكم ببومزوي. واياكم ديرو السياسة بهاد الشي. يكون شي حد عينو فشي حد وفاطار الصراع واللي يخلط المواطن.
وزارة الصحة دارت زبايل كثيرة. وزير الصحة باغي يلعب بوحدو. الا هاد القرار راك غادي تندم عليه. غادي ترون بلاد كلها