حل مشاكل الريف خاصو شجاعة بالعفو العام على جميع المبحوث عنهم فقضايا الكيف ويسمحو لهادوك اللي عايشين فاوربا ومبحوث عليهم عندنا يدخلو يستثمرو

من مطالب ناس حراك الريف ضمن مطالبهم الاجتماعية العفو على فلاحة مبحوث عليهم فقضايا عندها علاقة بالحشيش. هادي مطالب كتكرر مرة مرة فمناطق الشمال المغربي. منطقة فرضات عليها الجغرافيا زراعة الكيف حتى ولينا من المنتجين الاولين فالعالم. النقاش اللي كان حول تقنين الكيف فالمغرب مع كل من حزبي الاستقلال والاصالة والمعاصرة ما مشاش بعيد. اليوم كاينة حاجة لاحياء هاد النقاش. راه مهم بزاف للمنطقة.
فالحسيمة كما عدد من مدن الشمال عدد من الفلاحة البسطاء كيعيشو من هاد الزراعة ولكن كيعيشو رعب حقاش بزاف منهم مبحوث عليه. هاد الشي خاص، يسالي. علاش ما تكونش عند وزارة العدل الجرأة باش يديرو عفو عام على هادو ويشمل حتى هادوك الناس المبحوث عنهم ومتواجدين باوربا.
دابا كاينين مغاربة مبحوث عنهم يقيمون في اسبانيا وهولندا وبلجيكا وايطاليا. عير مسموح ليهم يدخلو للمغرب حقاش ايلى دخلو غادين يشدوهم. هادو خاصهم عفو الا لمن تبث تورطه فجرائم قتل او ما شابهها.
هنا المغرب غادي يطوي واحد الملف عالق وثانيا هادوك اللي عايشين فاوربا ومستثمرين بزاف فاوربا. ايلى دخلو فلوسهم واستثمروها فمنطقتهم ومنها الحسيمة راهم غاديين يحلو مشكل كبير ديال الشغل.
راه الحسيمة ما يمكن يستثمر فيها الا اولاد المنطقة والدولة حقاش جات فمنطقة زلازل وصعيب بزاف بزاف المستثمرين الاجانب يغامرو ايلى ما بانش ليهم الربح بزاف.
ديرو عفو عام على جميع المبحوث عنهم فالمخدرات وخليوا الناس دخل فلوسها اللي فاروبا وما يمكنش لشي حد يقول باللي راها فلوس فشي شكل حقاش محطوطة فبنوك اوربية ولا فمشاريع باوربا