طالبة مغربية فرومانيا بغات تدوز البوناني مع عائلتها فبلجيكا لقات راسها 11 يوم ف الحبس الانفرادي وتلغات ليها فيزا شنگن ديالها

albayancom0@gmail.com
طالبة مغربي كتدرس طب الاسنان (السنة الرابعة) باللغة الفرنسية ف جامعة رومانية طرات ليها واقعة غريبة. الطالبة المغربية اللي عمرها 23 عام وسمتيها وئام زيطي، حسب وسائل إعلام بلجيكية، كانت باغية تدوز كونجي البوناني ف المغرب، لكن اغلاق الحدود، خلاها تفكر باش تمشي ل بلجيكا عند عمها تدوز عندو شي ايامات ومن بعد يمشيو بجوج ل ليل الفرنسية باش تلاقا بخوها التوأم ويدوزو احتفالات رأسة السنة مجموعين، لكن المعاناة ديالها بدات مني حطات رجليها ف مطار شارلروا البلجيكي.
وحسب راديو وتلفزيون بلجيكا الناطق بالفرنسية، مشات للديوانة والبوليس وعطاتهم الباسبور المغربي ديالها وتصريح الاقامة ف رومانيا و فيزا شنگن السياحية ديالها الصادرة عن السلطات الفرنسية. ضابط الديوانة سولها على الغرض من زيارتها، وجاوباتو بالتفصيل على كلشي، لكن الضابط عاود سولها على كيفاش غادي تدبر المعيشة ديالها. الطالبة وئام، وعلى حساب حسب راديو وتلفزيون بلجيكا، ورات للضابط لاكارط بانكير ديالها وقالت ليه يمشي معاها ل گيشي باش يعرف انها قادرة باش تعيل راسها.
ووفقا للشابة وئام، ضابط الشرطة بدا كيتهكم عليها بملاحظات غير مقبولة وداها ل شامبر ف الطابق السفلي وتمت مصادرة أمتعتها الشخصية واخا عندها ضمانة ديال عمها، على حسب اللي حكات ل راديو وتلفزيون بلجيكا الناطق بالفرنسية، ومن بعد صيفطات شرطة الجمارك تقرير إلى مكتب الهجرة اللي قرر طرد الطالبة من الأراضي البلجيكية وإلغاء التأشيرة السياحية الخاصة بها.
التبرير اللي عطاه مكتب الأجانب، حسب راديو وتلفزيون بلجيكا، هو ان الطالبة لم تستوفي الشروط باش تدخل ل بلجيكا وبغات تبقى 22 يوم كاملة واخا عندها غير فيزا سياحية صادرة عن فرنسا وما قدراتش تبرر انها قادرة باش تخلص على راسها 45 يورو كل يوم حسب القانون. هاذ الهضرة كاملة، نفاتها الطالبة المغربية، وأكدات انها ما كانتش ناوية تبقى 22 يوم ف بلجيكا، وقالت ان الحاجة الوحيدة اللي قالت، هي توفرها على تذكرة طيران باش ترجع ل رومانيا ف 3 يناير 2022 لمواصلة دراستها الجامعية وجات ل بلجيكا باش تدوز ايامات مع عمها ومن بعد يمشيو بجوج ل ليل الفرنسية باش تلاقا بخوها التوأم ويدوزو احتفالات البوناني.
ودائما حسب راديو وتلفزيون بلجيكا، وضعت الطالبة المغربية ف الحبس الانفرادي لمدة 11 أيام وقررت توكيل محام اللي نصحها بتقديم استئناف استعجالي قدام محكمة قضاء الأجانب. كما استنكرات عدم تمكنها من حضور جلسة الاستماع. هاذ الشي برو المحامي أن الاستدعاء يمكن ما وصلش ل مركز التوقيف. "ما قتلت حد ما سرقت جيت باش ندوز عطلة نهاية العام مع عائلتي وعاملوني بحال المجرمة. تجربة سيئة ومزال كنحس بالصدمة"، تقول الطالبة المغربية، اللي غادي تدوز عيد الميلاد بوحدها بعيدة عن عائلتها، وأكثر حاجة مقلقاها هي إلغاء شنگن ديالها اللي يقدر يأثر على مسارها الدراسي لأن خاصها تدوز سطاجات ف بلجيكا وفرنسا وهاذ الشي هو اللي خلا المحامي ديالها يقدم طلب استئناف استعجالي لإلغاء قرار إلغاء الفيزا ديالها من طرف مكتب الهجرة.
https://www.rtbf.be/info/belgique/detail_une-etudiante-marocaine-de-23-ans-placee-11-jours-en-centre-ferme-avant-d-