الفيلم مزال ماسالاش. قاضي أسترالي حكم لصالح دجوكوفيتش اللي دخل للبلاد وبدا كيوجد للبطولة.. و لونكيط تفتحات على وثائق مشكوك فيها كان عطاها للمحكمة – تغريدات

قال نجم التنس العالمي نوفاك دجوكوفيتش فتغريدة فصفحتو على موقع "تويتر" : "من بعد كلشي اللي وقع، أنا ناوي نبقى هنا و نحاول نشارك بطولة أستراليا المفتوحة".
وزاد المنصف الأول عالميا، واللي فايت ليه ربح اللقب فمبلورن 9 ديال المرات (روكور) : " أنا فرحان وكنشكر القاضي اللي حكم ضد قرار إلغاء الفيزا ديالي. جيت لهنا باش نلعب وحدة من أهم البطولات وقدام جمهورها الواعر".
ورجع نوفاك دجوكوفيتش للتداريب، كيف قال خوه جورجي، بعدما قرر قاضي فدرالي أسترالي البارح الإثنين، "يطلق سراحو" من السونتر الخلص باحتجاز المسافرين اللي كان حاصل فيه وسط مطار ملبورن، وأكد (القاضي) عدم صلاحية قرار الحكومة بإلغاء الفيزا ديال نوفاك لدخول أستراليا.
وكان القاضي أنطوني كيلي، بإلغاء القرار السابق للحكومة الأسترالية على الفيزا ديال اللعاب الصربي، وطلب يتطلق سراحو من السونتر اللي هو محتجز فيه وسط مطار ملبورن، زائد أنه طلب من الحكومة تخلص جميع التكاليف.
وفالمقابل قال محامي حكومة أستراليا، كريستوفر تران، بللي إصابة دجوكوفيتش بفيروس كورونا ما سمحاتش ليه يتعفى من قيود السفر اللي مفروضة فظروف هاد الجايحة، وكيشوف بللي قرار إلغاء الفيزا ديال اللعاب الصرفي ماكان فيه حتى شي ظلم.
و وخا دجوكوفيتش ماعمرو تكلم علانية على واش هو شخصيا خدا الفاكسان أو لا، ولكنه أكد لمسؤولين فبوليس الحدود الأسترالية أنه ما ملقحش.
وقال فأنترفيو سابق بللي تصاب بكورونا جوج ديال المرات، وحدة شهر يونيو 2020، و الثانية نهار 16 ديسمبر 2021.
دبا من بعد الصداع اللي وقع، و أساسا الأزمة الديبلوماسية اللي ناضت بين أستراليا وصربيا، بسباب احتجاز نوفاك فمطار ملبورن و منعو من دخول أستراليا للمشاركة فبطولتها المفتوحة للتنس، من بعد هاد "الفيلم" كلو السيد دخل للبلاد و بدا كيتريني و كيوجد يشارك.
و لكن هاد لافير مزال ماسالاتش. وحسب وسائل إعلام دولية، بدات السلطات الأسترالية لونكيط على عدد من الوثائق و الأدلة اللي عطاهم دفاع دجوكوفيتش للمحكمة اللي حكمات بالقرار المذكور. قالك كاينة شكوك على أن هاد الوثائق يقدرو يكونو "مزورين".
صحيح أن نوفاك دخل لأستراليا ورجع كيتريني، و لكن كلشي كيتسنا نتائج لونكيط اللي تفتحات واللي تقدر تقلب كلشي من جديد.