الرئيس الروسي بوتين: القرار ديال الحرب ضد أوكرانيا ماكانش ساهل وحنا معولين على كلشي

الرئيس الروسي فلاديمير بوتين، كَال اليوم السبت، بللي إطلاق عملية عسكرية سماها ب"الخاصة" فأوكرانيا كان "قرار صعيب".
وجا تصريح بوتين بمناسبة زيارتو لمركز تدريب طيران تابع لشركة "إيروفلوت" (Aeroflot).
وكَال بوتين فهاد الزيارة بللي السلطات الأوكرانية "استمرات فهاد السنوات الفايتة فخرق كل الاتفاقات اللي كانت بيناتهم، وفوق من هادشي قتلات 13 ألف روسي فمنطقة دونباس"، وأكد بللي "خاص يكون عند أوكرانيا وضع محايد مايخليهاش تدخل لحلف الناتو".
وزاد الرئيس الروسي كَال بللي "حلف الناتو كيدعم أوكرانيا لأنها واقفة ضد موسكو"، ولكن القوات الروسية، بالنسبة ليه، "قريب تسالي مع البنية التحتية العسكرية فأوكرانيا وغادي تدكَدكَها".
وجا أيضا فكلامو بللي "فرض منطقة حظر طيران فوق أوكرانيا كنعتبروه مشاركة فأعمال عدائية ضدنا"، وزاد بأن موسكو "حطات قواتها ديال الردع النووي فحالة تأهب من بعد تصريحات بريطانيا على احتمال تدخل حلف الناتو فأوكرانيا".
وأشار بوتين إلى أن "العقوبات المفروضة علينا هي بحال إعلان حرب ضد روسيا"، ولكنه استبعد لحد الساعة فرض إجراءات ديال حالة الإسثناء أو حالة الطوارئ فبلادو روسيا.