عامل سطات عطى للمستشار البلطجي 10 أيام باش يجاوب على الفوضى وكلام الزنقة لي قالو فدورة المجلس البلدي

قضية المستشار الفوضوي البلطجي لي دار حالة في اخر دورة ديال المجلس الجماعي بسطات ، ولي ولا باغي يخلي دار بو المستشارين الجماعيين من بينهم ذاك الشي لي تعرض ليه نائب رئيس الجماعة زائد تخريب ممتلكات الجماعة.
مراسلة توصلات بها "گود" موجهة من عامل إقليم سطات ابراهيم ابو زيد عبر باشا مدينة سطات الى رئيس الجماعة المصطفى الثانوي باش يجاوب المستشار الجماعي في اجل 10 ايام على ذاك الشي لي دار في دورة المجلس وخصو يوضح كتابيا هاد الشي.
مصدر "كود" قال على انو المستشار البلطجي جاياه جاياه مسطرة العزل واخا يبقى يدور تا يعيى لانه المادة 64 من القانون 14.113 ديال الجماعات الترابية واضحة غير الى مبغاش يفهمها هاد المستشار لي قاليك كيقرا الدكتوراه في القانون.
في اتجاه اخر السلطات المحلية حطات شكاية عند وكيل الملك بالمحكمة الابتدائية بسطات على خروقات بالجملة من بينها ان هاد المستشار لي مشى بنى طاج على قدو في دارو ودار ما بغى بلا ترخيص بلا تا حاجة امام اعين السلطات لي مقدراش تحبسو او كتفات بانجاز مخالفة رغم انها كانت دخل او توقف عند حدوا .