فينما يجي عيد الميلود ! كاينوضو السلفيين يحيحو على اتباع الزوايا الصوفية فالمغرب ! حگا و الواد هادشي لي كاديرو فيه ” شرك و بدعة و خرافة ” فحالا هوما بوحدهم لي عندهم الروسيطة ديال الاسلام !

غي كايوصل عيد الميلود و كايخرجو السلفيين من الجحور ديالهم كايتنابحو عاوتاني علاش قاليك آ سيدي المتصوفة يحتافلو بالميلود بالطريقة ديالهم ! علاش ينقزو و يشطحو و يهزو المرفودة و دوك المظاهر لي كايعتابروهم السلفيين ” بدع و شرك ” و قاليك ” خرافات غير منطقية” فحالا التدين و الايمان كايدخل فيه شي منطق ! راه غا الروحانيات آ سي محمد هادوك و كل واحد و كيفاش كايتروحن مع قبو ! و طالما ماكايعتاديش عليا و على حريتي الشخصية يمارس الطقوس لي بغا بالشكل لي بغا ! علاه فين عمر كان شي منطق و لي لوگوس فهادشي ؟!
المشكل مع السلفيين و مع گاع المتشددين كيما كانو انهم باغين يفرضو الوصاية ديالهم الدينية على عباد الله و يگولو للمغاربة كيفاش يحتافلو بعيد الميلود و شنو يديرو و شنو مايديروش ! فحالا المغاربة ماعمرهم كانو مسلمين و عاد سلمو البارح ! هاد الوصاية هادي لي كايحلمو بيها هي لي خاصهم يعرفو انها عمرها ماغادي تكون فظل إمارة المؤمنين ! المغاربة ماغايلبسوش على ذوقكم ! و ماغاياكلوش على ذوقكم ! و ماغايصوموش على ذوقكم و ماغايآمنوش على ذوقكم ! و شكون نتوما لي باغين تخلقو منا گنس فوطوكوبي شي كايشبه لشي ! آ لا يا سيدي ! الاختلاف كاين و غايكون و من الصحي انه يكون.
التصوف فالمغرب عندو تاريخ و تاريخ طويل ! و الزوايا لعبات ادوار سياسية و تاريخية مهمة ! هزات دول و حطات دول ! التصوف هوا الاسلام لي كايعرفو المغاربة قبل مايبانو الفقها ديال النايلسات ! ايه طبعا الطقوس ديالها فيها بعض المظاهر الهمجية ! و لكن لا تقل همجية على الفكر الداعشي الاقصائي لي كاتدعيو ليه ! هادوك فيهم لي كايذبحو الناگة و كاياكلو المعزة خضرا بزغبها و نتوما ماكرهتوش تعيشونا فالتهيميج ديال القرون الوسطى بالافكار ديالكم الظلامية و لي نهار تعطاها شوية ديال السلطة و يكون المناخ مساعدها الاكيد انها غاتنتج لينا شي تهيميج فين يبان التهيميج ديال الحركات الجهادية فسوريا و افغانستان و العراق.
المهم فالتدين انه يبقا فالحقل الشخصي ! بين الفرد و الله ! و ديك الساعة يمارس الفرد التدين ديالو كيما بغاه فدارو و يسد عليه بابو ! ياك مادخلوش عليك المتصوفة لبيت النعاس ديالك يجذبو ليك فوق الموكيط ؟! ايوا علاش غايضرك راسك من جيهتهم ؟! و لا بغيتي تشد المونوبول ديال الدين ! غاتشد فالبولة ديال التسعين !