"كود" قلبات على "الفاسق" فقصة الدكتور التازي مع قضية "الاحتيال على المتبرعين" بعد المنشور لي خرج فصحفتو.. وصلات لأنه غير احتيال جديد باش يدوخ الناس وها آش وقع فرحلة بحث "كود" على حقيقة وجود الجراح الشهير فالحبس من عدمه

فالوقت الذي تستمر فيه التحقيقات في "النصب على المتبرعين" وسط تكتم على المعطيات مضروب بشدة حرصا على مبدأ سرية الأبحاث، حدث تطور مفاجئ فالقضية.
هاد التطور كان من جهة الدكتور التازي لي سعى مجددا لتوظيف مواقع التواصل الاجتماعي في قصته الجديدة، بعدما كانت سببه في زيادة شهرته عندما استغلها في استعراض مهاراته والعمليات لي كان كيدير وما كان يقول بأنه "أعمال خيرية إحسانية".
نرجعو لما دار البارح. الجراح المختص في التجميل، الذي تشير جميع المعطيات المتوفرة والموثوق من صحتها إلى أنه من بين الأشخاص الخمسة لي تقرر إيداعهم رهن الاعتقال الاحتياطي ولي دوزو أول ليلة فرمضان فعكاشة، خرجت صفحته في حسابه بموقع "فيسبوك"، بمنشور رسالتو كانت واضحة هي تكذيب كل ما كتب في الموضوع، بنشرها آية "إذا جاءكم فاسق بنبأ"، والتي أرفقت بصورة للتازي ومعها عبارة "اسمعو مني ولا تسمعو عني فالإشاعة يؤلفها حاقد وينشرها أحمق ويصدقها غبي"، في إخراج كان الهدف منه الإيحاء بأنه ما معتقل ما والو وكاع لي كيتكال عليه كذوب.
طبعا الخرجة، فظل الاهتمام الكبير لي كتحظى به دابا حاليا عند الرأي العام، أثارت جدل، وكانت وراء طرح المزي من علامات الاستفهام حول ما هاد القضية وما تشهده التحقيقات فيها من تطورات.
وهي التساؤلات التي ما سعت "كود" إلى تقديم إجابات بالبحث عن "الفاسق" في هذه القصة، التي يبدو على أنها ستكون حبلى بالمعطيات المثيرة وقد تكون حتى صادمة عند انطلاق محاكمة المتابعين في هذا الملف، والبالغ عددهم 8.
وقد بدأت رحلتها بطرح الأسئلة الصحيحة على شكون لي خاصو يسمعها. وطبعا، في هذه الحالة الدكتور التازي وفريق عمله، إذا أخذنا بصحة ما جاء في المنشور.
وهذا ما عملت عليه "كود" صباح اليوم. ففي بحثها عن "الفاسق" والحقيقة حاولت تربط الاتصال بالدكتور التازي أو أي من فريق عمله، وذلك من خلال الأرقام لي تضمنها المنشور وأيضا العنوان البريدي الذي أرفق بهما.
صحافي "كود" اتصل بالرقم 0522863004 مرات عديدة قبل ما تجاوب شابة بالقول "ألو..
الصحافي: ألو.. الله يخليك هذا مكتب الدكتور التازي
الشابة: شكون معايا؟
الصحافي: معاك أنس العمري من جريدة "كود".. كنا إذا أمكن بغينا ربطو الاتصال بالدكتور التازي يعطينا تصريح أو يحدد معانا موعد للقاءه وإجراء مقابلة معاه باش اليقين ناخدوه منو ونبينو حقيقة "الفاسق"؟
... الخط تقطع
لكن فالمحاولة الثانية كا تجاوب، إذ ردت محدثتنا، بعد استعراض طبعا الغرض من الاتصال، على طلبنا بالقول "نعطيك الرقم ديال لكلينيك الشفاء تما كاين الريسبونسابل لي يقدر يجاوبك على الأسئلة ديالك".
الصحافي: شكرا ليك
المتحدثة: مرحبا.. وهذا هو الرقم 0522859220
"كود" اتصلت بهاد الرقم، لكن هاد المحاولة كان مصريها بحال الأولى، إذ بعدما ردات علينا سيدة وشرحنا ثاني الغرض من الاتصال.. ردات علينا بالقول "خليك معايا"... وهي لحظة طال الانتظار فيها قبل ما يتقطع الاتصال بمرة دون تلقي أي إجابة.
الخلاصة وهي أن كاع المحاولات "كود" مجايتش فايدة، وهذا ما عندو إلا تفسير واحد هو أن السيد فالحبس ومكينش حنت ملقيناش لي يفيدنا فالموضوع، وبالتالي الاستنتاج لي يمكن الواحد يخرج بيه وهو أن المنشور ديال فيسبوك غير احتيال جديد باش يدوخ الناس.
دابا كاين جوج حوايج يا إما النيابة العامة كذابة ولا البوليس كذاب، على حساب هاد البوسط المنشور، حيت خرج بلاغ رسمي يؤكد المتابعة ديال مالك المصحة ومراتو وخوه والباقين.
وإلى كان الخبر صحيح وحنا متأكدين أنه صحيح، فخاص اللي نشر هاد البوسط يتعتاقل ويبحثوا معاه، لأنه نشر معلومات مغلوطة وثانيا تيشكك في المؤسسات ديال البلاد، وثالثا تيتهمها بالفسق ويستعمل الدين باش يجيش الناس ضدها، ورابعا أنه نشر أرقام هواتف تتبين بلي المصحة مازال خدامة، واللي تاصل باش يعرف الحقيقة تيلقى مستخدمات ماعارفات والو، وميقدرو يفيدو بحتى شي حاجة.
حتى الايميل اللي دايرينو رسلنا ليهم ميساج وما عمرهم ردو علينا ف"كود".
دابا السيد فعكاشة وناشر هاد الفضيحة، أش بغا يقول زعما، وعلاش استخدم الدين، كان عليه يستخدم الدين ملي كان تيستغل الفقراء باش يكوش على الملايين ديال التبرعات والمساعادات.
كان عليه يستعمل الدين ملي كان تيدخل 25 مليون فالنهار من التزوير والنفخ في الفواتير.
شوفو غير واحد الفرملية خدامة عندو، كانت حازقة إلى رجعنا واحد عشر سنين اللور، دابا البورش والدراري تيقراو فالخارج ومشاريع ديال ليستيتيك وزيد.