باش تعرف بيمن محزم يا لوزير لعرج وغادي يخلعك بعلاقتو بالقصر الملكي. مديرك اللي كيلحس ليك الكابة تهاني راه دا عائلتو كلها ورمى العار على الخلفي نهار تعين وطعنو فظهرو من بعد

دابا السي عبد الاله تهاني اللي جابو مولاي امحمد خليفة ودخلو لديوانو بعد ما كان فالبرلمان وكان كيهز ليه الشكارة ولى هو الحاكم بامره بوحدو فوزارة الاتصال. من نهار تعين لعرج وزيرا للاتصال والثقافة وهو كيحساب ليه راسو الوزير الفعلي. فقرارة نفسو كيقول ومال وزارة كبيرة علي راني غدا نكون وزير. عندي القصر معايا فشخص الناطق الرسمي باسم القصر الملكي عبد الحق لمريني اللي هو فالحقيقة موظف شبح حقاش ما عمرو نطق وكيخلص. بهاد المريني كيعتقد تهاني انو وصل.
باش تعرفو مزيان هاد تهاني بلا ما نهدرو على تاريخو من نهار لاحو حسن العلوي برجلو فجريدة حزب الاتحاد الاشتراكي٬ نعاودو قصة حكاها مصطفى الخلفي باش كان وزير للاتصال لكل من الصحافيين علي انوزلا ومحمود معروف. قال ليهم٬ وفق مصدر "كود"٬ نهار تعين جا عندو تهاني لدارو ومعاه كاع عائلتو. طلب ورغب. بحال هاديك القضية ديال رمى عليه العار وقال ليه نعاونك. دار اللي كيدير مع كل الوزراء. لدرجة انهم كيصدقو. ما كانش يخرج من عندو وهو عاطيه ظهرو. هادي تربية الخليفة باش كان وزير٬ والقصة كلشي عارفينها. السيد طعن الخلفي اللي اصلا ما فيدوش. يمكن هو اللي علمو هاد الفكر. حقاش من بعد حتى هو غادي يتخلى على اللي دار منو وزير بنكيران ومشى عند ابن عرفة الحزب باش يبقى وزير
دابا لعرج خاصو يعرف نهار دارو فطور مع السينمائيين وجا لابس جلابة بيضا بحالو راه داخلة فتفكيرو انو احسن من هاد الوزير وباللي هو المخاطب.