كلشي كيضرب فرئيس الحكومة الصبليونية بخصوص مغربية الصحرا. خاص صوت المغرب يتسمع فاعلامهم وهاد الشي محتاج فرق متخصصة ولكن ما يقربش منهم بوريطة ويخلي ناسو بعاد على هاد الشي

غدا تبدا زيارة تاريخية لرئيس حكومة اسبانيا الاشتراكي پيدرو سانشيث للمغرب. غادي يتلاقى بالملك محمد السادس بالقصر الملكي بالرباط. غادي يفطر معاه قبل ما يرجع لبلادو. زيارة تاريخية حقاش جات بعد قطيعة دامت اشهر بين الدولتين. كان المغرب استدعى سفيرتو كريمة بنعيش وعرفت الازمة حدة كبيرة. تجاوزات الرباط ومدريد هاد المرحلة الحساسة فتاريخ البلدين الجارين بعد رسالة سانشيت للملك وفيها تغيير فعقيدة الاسبان: مع صحراء مغربية تتمتع بحكم ذاتي.
تقبر نهائيا "تقرير المصير" من دولة عندها مسؤولية تاريخية فقضية الصحرا.
دابا مشكلة سانشيت داخلية. كلشي ضدو. اليمين واليمين المتطرف اللي فالمعارضة ضد هاد التغيير الجذري فالسياسة الخارجية الصبليونية. اليسار الراديكالي سواء مشارك فالحكومة او داعم ليها ضد٬ حتى هو٬ هاد التحول. الاحزاب القومية فكاطالونيا والباسك حتى هي ضد هاد التغيير.
الحزب الاشتراكي العمالي الصبليوني الحاكم بوحدو كيدافع علي هاد التغيير. طبعا معاه الدولة العميقة٫ غير هي دولتهم العميقة ما كتهدرش ما عندهاش رأي سياسي. سياسيا سانشسيت بوحدو.
اللي متبع النقاشات فوسائل الاعلام ديالهم من قنوات اخبارية او برامج سياسية واذاعات وصحف... كيبان ليه كلشي ضد هاد التوجه.
النقاش السياسي عندهم غايب فيه صوت المغرب. غايب فيه اللي يقدر يدافع على المغرب. باستثناء مدير نشر "لاراثون" فرانسيسكو مارويندا وشي مرات مدير نشر "اوكي دياريو" ما كاينش صوت المغرب او شي حد يدافع على المغرب.
هاد الفراغ كتحمل سفارة المغرب فمدريد او الدولة المغربية مسؤوليتو. خاص ماشي شي حد يفهم ويتعالم. اللا خاص شي حد قوي فالعلاقات العامة. كيفهم الواقع السياسي الاسباني وعندو خبرة فالصحافة ويكون على اتصال يومي مع وسائل اعلامهم. يتغدى معاهم ويتعشى معاهم ويضرب السيربيسا والبينو والخامون ويدافع على وجهة نظر المغرب بعقلانية.
هاد الشي دابا بيد كريمة بنيعيش سفيرة المغرب فمدريد. هي اللي تقدر تطلب فرقة قوية فهاد الاتجاه. ما تعولش على ناصر بوريطة وزير الخارجية. هادا كيقلب ديما ونعاودوها ونقولوها٬ على مصالحو الشخصية. على اللي يطبل ليه. هو عندو ناس كيفهمو مزيان فالعلاقات المغربية الاسابنية ولكن كيعبدوه. كيشهدو بيه. خدمتهم كيبرگگو ليه اش كتب هادا اش دار هادا علاش هادا دافع على هاداك القنصل او ديك السفيرة. شكامة. خلاو الديبلوماسية وقلبوها شكيم. هاد الخدمة بداوها من بداية الازمة وتقوات مع مشكلة سبتة.
دابا السفيرة خاص تطلب مباشرة من القصر ماشي من بويطة هاد الشي. ايلى تبعات هاداك وزير الخارجية ما عمرها تاخد شي حاجة.
عودة العلاقات المغربية الاسبانية كانت باشراف القصر واشراف شخصي من الملك. باش هاد العلاقات تقوى خاص دعم مباشر من القصر. وزير الخارجية يخليو ليه التصاور ويعطيوه اش يقول.
هو كيكره امثال كريمة بنيعيش ويتمنى ما تبقاش سفيرة للمغرب فمدريد. اللي عندو علاقة مباشرة مع القصر ما كيحملوش. غير مدريد وباريس ولندن وواشنطن والسعودية والامارات ماشي فيديه. سفارات بعيدة عليه. كيبقى ينوعر وصافي. يدير لعصا فالرويضة
دابا مرحلة جديدة خاص تفكير جديد بعقلية جديدة ولكن بوريطة وحاشيتو خاصهم يبقاو بعاد