14500 فرنسي عايشين فالمغرب صوتو . قرابة 10 بالمائة صوتو على اليمين المتطرف اللي باغي يجرى على الاجانب و43 بالمائة صوتو على ميلانشون و37 بالمائة على ماكرون

حسب النتائج المؤقتة للانتخابات الرئاسية الفرنسية فدورها الاول اللي دار البارح الاحد 10 ابريل 2022 فان 14507 فرنسي مقيم فالمغرب او مغاربة عندهم الجنسية الفرنسية صوتو فمدن الرباط وطنجة واكادير وفاس وكازا. كاين فيهم 7743 فرنسي صوتو فقنصلية فرانسا فكازا و3696 فرنسي صوتو فقنصلية الرباط و1446 صوتو فقنصلية اكادير و759 فرنسي صوتو طنجة و799 صوتو ففاس.
تصويت الفرنسيين المقيمين فالمغرب مشى لليسار الراديكالي فحزب "فرنسا الابية" وزعيمها اللي تزاد وكبر فطنجة جون لوك ميلانشون. بوحدو جاب 6255 صوت وهو ما يمثل 43.12 بالمائة من الاصوات يليه الرئيس المنتهية ولايتو الليبرالي ايمانويل ماكرون اللي جمع 5427 صوت وهو ما يمثل 37.41 بالمائة. المفاجأة كانت نتيجة اليميني المتطرف ايريك زيمور. صوت على هاد الصحافي اللي قلبها سياسة 796 شخص وهو ما يمثل 5.49 بالمائة ثم الرتبة الرابعة جابتها مارين لوبين زعيمة القوى الوطنية وحتى هو حزب يميني متطرف. صوت عليها 558 صوت وهو ما يمثل 3.85 بالمائة
اقل نسبة حصلات عليها ناطالي ارنو. جابت 25 صوت وهو ما يمثل 0.17 المائة زعيمة من اليسار الراديكالي كذلك "النضال العمالي"