سكوب.. ملف التوظيفات المشبوهة فسطات لي مورط فيها العميد المعفى الحجيوي هي لي خلات الميراوي يعفي رئيسة الجامعة شفويا

محدها تقاقي وهي تزيد في البيض، حصلت "گود" على معلومات حصرية من مقرب من عبد اللطيف الميراوي وزير التعليم العالي والبحث العلمي والابتكار على ذاك القرار الشفوي ديال اعفاء خديجة الصافي رئيسة جامعة الحسن الأول بسطات.
مصدر قال ل "كود "بلي ملف التوظيفات المشبوهة ليدازت من 2019 حتى لنهار لي عفى فيه عزيز اخنوش العميد لي كان نجيب الحجيوي،لي وظف في الناس ماشي بمعيار الكفاءة ولكن بمعيار القبلية ومعايير اخرى وراه خص فعلا تحقيق في گاع الاسماء لي دازت ، هاد الشي كان من الاسباب الرئيسية لي طيرات هاد الرئيسة من بلاصتها، وراه مزال ملفات اخرى لي غادي تطيح في جامعة سطات .
وكانت "كود" نشر في مقالات شحال هادي بان عناصر الفرقة الوطنية مزال تحقيق في ملفات خانزة في كلية الحقوق بسطات او طرقات "كود "لملف التوظيفات المشبوهة ولي قالت هذا الدوصي غادي اطيح رؤوس، وبداو برئيسة الجامعة.
في هذا السياق سبق وقالت مصادر مطلعة بلي كانت عناصر الفرقة الوطنية للشرطة القضائية بالدار البيضاء كتحقق في ملف "الجنس مقابل النقط" طاحت على وثائق كثبت تزوير في النقط والشواهد ولي مكتوبة فيها مراسلات لرئيسة الجامعة، ومن تما دارو المحققين مراسلة للوكيل العام للملك بمحكمة الاستئناف بسطات من اجل مباشرة التحقيق في ملف جديد غادي يزلزل الرأي العام في سطات ووطنيا بحيث من المحتمل يطيحو رؤوس اساتذة ومسؤولين وموظفين ساهمو في التلاعب بالنقط والوظائف.وهاد الشي لي قالتو "گود" راهو لي كين الى حدود اللحظة .
مصدر خاص ل "گود" سبق قال على أنه إذا الفرقة الوطنية للشرطة القضائية مشات للكلية وجبدات ملفات التوظيف لي كانت في عهد العميد نجيب الحجيوي وتبعاتها خيط بخيط غادا توقف على خروقات كتعلق بسرقة وثائق من ملفات مرشحين لهاد الوظائف ديال استاذ تعليم عالي مساعد.
مصدر قال ل "كود "، على ان موظفة في الكلية سميتها سلوى واحد النهار كانت كتغوت وكتتهم (محمد.ب) منسق ماستر المالية العامة لي سداتو ليه الوزارة مني عطات ريحتو، وهو نفس الشخص لي صاڤاه غا التقادم في ملف الجنس مقابل النقط، تتقول على أنو كان كيحيد المقالات العلمية من ملفات مترشحين باش يدوز ديولو وفي الجامعة كلشي عارف هاد الفيلم ديال التلاعبات في التوظيف.
وزاد مصدر "گود" كيقول ساهلة على الموظفة متخافش وتقول كلامها قدام عناصر الفرقة الوطنية وايضا الى الجامعة منحات للمحققين ملفات الكونكورات لي دازو ومن بعد يتم استدعاء الناس لي سبق دوزو ويجيو يشوفو الملفات واش ناقصة ولا كاملة والى مشات التحقيقات بعيد كن اكيد انه غادي يوصل لعين علي مومن عند صحابو.
والفرقة الوطنية للشرطة القضائية بالدار البيضاء راها مزال خداما على الضواصة في هاد الجامعة كطيح فيهم واحد واحد