الجمعية المغربية لحقوق الضحايا، دارت ندوة صحافية فطنجة صباح اليوم الجمعة، موضوعها كان المليونير الفرنسي جاك بوتيي والشكايات اللي تحطات ضدو هنا فالمغرب وففرنسا. وتقدمات مجموعة من المغربيات اللي قالو انهم تعرضو للاغتصاب والتحرش الجنسي من جاك بوتيي بشكايات جديدة للقضاء المغربي والقضاء الفرنسي. وحطات هيئة الدفاع المترافعة فالملف 4 شكايات فالمحاكم الفرنسية والمغربية، ومن المرتقب يتزادو جوج شكايات السيمانة الجاية. وقالت عائشة كلاع، رئيسة الجمعية المغربية لحقوق الضحايا، ان أفعال التحرش والاغتصاب الجنسي ماكانتش كتقتصر غير على مول شركة Assu2000 سابقا واللي ولات سميتها Vilavi حاليا، بل متورطين فيها حتى مسؤولين اخرين. وأضافت كلاع ان جاك بوتيي استغل ثروتو وفلوسو باش يكون عصابة إجرامية، وفرت كاع الظروف المناسبة لاستغلال البنات. وتبين من خلال الندوة ان مظاهر الاعتداء على الضحايا ماكانش فيها غير الجانب الجنسي ، بل حتى ظروف الخدمة الصعيبة، العطل المغربية ممنوعة، السوايع ديال العمل كثيرة، الظغط النفسي وزيد وزيد. وقالت المحامية ان بوتيي كان كيتحرش بالعيالات اللي خدامين عندو فالمغرب، وكيضغط عليهم باش يعطيوه أرقامهم، والى مابغاوش كيمشي عند رؤسائهم المغاربة لتسهيل العملية.. للاشارة المليونير الفرنسي جاك بوثيي، اعتاقلو البوليس الفرنسي بعد الشكايات اللي اتهمتو باغتصاب واحتجاز واختطاف قاصرات، منهم مغربيات.
