كيقلبو على البوز.. خرجو تصاور آمبر هيرد كتباوس مع بنت وسط السانسور فايامات زواجها مع جوني ديب

قضية آمبر هيرد وطليقها جوني ديب مازال شاعلة وكل مرة كيبان "الجديد" اللي كتحاول بعض وسائل الإعلام ورواد فالسوشل ميديا يروجو بيه الحركة بإثارة أكبر عدد من الجمهور ولو على حساب الحياة الشخصية ديال ناس آخرين وحرية اختياراتهم.
موقع "Popcorned Planet" الميريكاني نشر تصاور قالو أنها حصرية خداوها من كاميرات المراقبة ديال الدار اللي عاشت فيه آمبر هيرد وجوني ديب مللي تزوجو ف2015، وروجو على أنها "سكوب" ديالهم على كيف كانت آمبر كتخون "ثقة" جوني وهوما مزال أونسومبل.
وبانت آمبر هيرد مع مرا مجهولة كيتباوسو وسط السانسور، قال موقع "American Post" بللي تقدر تكون المرا الأخرى هي المانكان البريطانية المثلية كارا ديليفين.
آمبر هيرد هاجموها أيضا وتنمرو عليها بزاف فالأنترنت فقط بسباب هضرة راجت على إقامتها علاقة ثلاثية مع كارا ديليفين والملياردير إيلون ماسك، وهادشي جا على لسان صاحبها وجارها قدام المحكمة، اللي قال أن آمبر هي اللي خبراتو أنها دوزات ليلة مع إيلون ماسك وكارا ودارو علاقة جنسية ثلاثية.