مزال غابر وضارب الطم.. ويل سميث ربح جائزة جديدة بشخصية الكينكَ ريتشارد

ربح الممثل الميريكاني ويل سميث جائزة جديدة على لعبو لشخصية الملك ريتشارد (King Richard)، بعدما دازت 3 شهور على التصرفيقة اللي جمعها مع الكوميدي كريس روك، اللي كان طنز على مراتو بسباب شعرها اللي فيه التونية، وسط حفلة الأوسكار الفايتة.
فحفل توزيع جوائز "BET" اللي داز نهار الأحد، 26 يونيو 2022، تعلن فوز سميث (53 عام) بطروفي أفضل ممثل ف"الكينكَ ريتشارد" اللي خدا أيضا جائزة أحسن فيلم.
جورنال "People" قال أن ويل سميث ماشي خو اللي جا خدا الجائزة بشكلٍ شخصي وماحضرش نهائيا لحفل توزيع الجوائز.
ولحد الساعة باقي الممثل ويل سميث غابر فالواقع وحتى الڤيرتيال وضارب الطم، وكان آخر بوسط دارو هو اللي بارطاجا فشهر مارس اللي فات.