وا اغبياء التواصل فالقصر الملكي راه محمد السادس ملك لمغاربة ماشي لفرنسيس. ايلى رجع لباريس خاص الصحافة المغربية تخرجها ماشي صحابكم "جون افريك" وانتوما خاصكم طيرو من بلايصكم وسيرو عيشو فباريس

كاينين شي اغبياء مكلفين بالتواصل فالقصر الملكي. شوفو لخبار ديال البارح. نشرات مجلة فرنسية مالينها توانسة اسمها "جون افريك" خبار باللي الملك محمد السادس رجع بعد الخطاب الملكي لعيد العرش نهار 30 يوليوز اللي فات لباريس.
لخبار اللي تنشر فموقع المجلة قال باللي السبب هو تدهور الحالة الصحية لوالدتو لالة لطيفة. بغى يبقى حداها.
تصورو هادا رئيس دولتنا. ملكنا. اللي مريضة والدتو وارملة الملك الراحل الحسن الثاني. اللي نشر الخبر او تعطاهم لخبار هي جريدة فرنسية.
العبث بعينيه ونيفو صافي. احتقار للمغاربة لاعلامهم لكلشي. هدا موضوع كيهم غير لمغاربة. او كيهمهم بدرجة كبيرة علاش اللي مكلفين بالتواصل فالقصر عطاوه لهاد المجلة.
ممكن تقبل يعطيوها خبار بحال ديال راه محمد السادس جاب طباخ افريقي لانو عزيز عليه الاكل ديال شي دولة. هادي معقولة. اما خبار طلاق سيدنا كيف خرج ف"اولا" النسخة الاسبانية٬ او مرض امو او سفرو باش يكون حدا ماماه٬ هادا خاصو يخرج فالاعلام المغربي. عندكم كاع انواع الاعلام: نشروه فين ما بغيتو ولكن فالمغرب ماشي عند البراني.
هاد المكلفين بالتواصل فالقصر خاصهم يعرفو راهم كيتخلصو من عند لمغاربة وخدامين عند لمغاربة. خاص تبان عليهم النخوة ديال المغاربة وما يرضاوش شي خبر كيهم مؤسسة القصر او سيدنا تخرج الا فالاعلام المغربي ومن بعد راه الاعلام العالمي ياخدها منهم.
علاش العالم كولو ممنوع اخبار الدولة تنشرها وسائل اعلام دولية الا هاد لبلاد السعيدة. شوفو غير دول حدانا وبحالها راه ايلى تنشر خبار بحال هادا فجورنال اجنبي تنوض القيامة.
خاص هاد المكلفين بالتواصل لمراض بالاعلام الغربي يمشيو فحالهم. يمشيو يخدمو ففرانسا عندهم. مراض هادو