عاجل. واش تظلم ولد الملايري؟. مول "لامبورگيني" هبط لحبس الصومال مع متهمين آخرين منهم طبيب ماحضرش للتقديم وها التهم اللي توجهات ليهم

علمت "كود" أن قاضي التحقيق بالمحكمة الابتدائية بمدينة تطوان، قرر مساء اليوم السبت، باش يتابع "ولد الفشوش"، مول الطوموبيل "لامبورغيني"، في حالة اعتقال احتياطي بالسجن المحلي الصومال.
وحسب المعلومات اللي حصلات عليها "كود"، فإن قرار الاعتقال شمل اثنين آخرين، فيما قرر قاضي التحقيق متابعة شي مرا (فرنسية وكانت فالطونوبيلة) داخلة فهاد القضية في حالة سراح، في انتظار إخضاع الجميع للاستنطاق التفصيلي 31 غشت الجاري.
وذكرت المصادر ل"كود" أن وكيل الملك بتطوان التمس من قاضي التحقيق إجراء تحقيق في مواجهة مول الطوموبيل "لامبورگيني" ومع معه، بعدما تسببت فكسيدة بالمدارة الواقعة وسط مدينة المضيق بشارع "لالة نزهة"، وهرب السائق ديالها.
قاضي التحقيق استمع لهاد المتهمين إعداديا، وقرر متابعة حتى شي طبيب متورط فهاد القضية، مع الإشارة أن هاد الطبيب هو المتهم الخامس، ولم يتم تقديمه حقاش مجاش للمحكمة باش يدوز حدا النيابة العامة رغم إشعاره بتاريخ التقديم.
التفاصيل الخاصة اللي حصلات عليها "كود" كتقول باللي قاضي التحقيق وجه تهم جنحية مختلفة لهاد المتهمين، إذ قرر متابعته من أجل "الفرار عقب ارتكاب حادثة سير بغرض التملص من المسؤولية الجنائية، إهانة موظف عمومي بالتصريح لدى السلطات بارتكابه جنحة لم يرتكبها".
كما تابع الباقي من أجل "المشاركة في الرشوة بإعطاء شهادة كاذبة بوجود مرض بصفته طبيب، مع استعمال عن علم شهادة غير صحيحة ومزورة والمشاركة في صنعها، والتزوير في محرر عرفي واستعماله، المشاركة في إهانة موظف عمومي بواسطة أقوال من شأنها المساس بالاحترام الواجب له، مع إضافة الإقامة الغير الشرعية".
مصادر "كود" أكدات باللي الشرطة القضائية عملت على استغلال الكاميرات المرصودة ودارت لونكيط على جميع المعطيات بهدف استغلالها فهاد القضية، مشددة على أن السطرة اللي مشات للنيابة العامة كانت مستوفاة لجميع الشرطة القانونية المعمول بها، وتم استغلال حتى كاميرات الأماكن اللي دازو منها المتهمين.
هاد الفيلم كولو اللي مظلوم فيه هو ولد الملياردير هيلا. ما عندو علاقة بالكسيدة. متابع على قضية طونوبيلة شراها قانونيا من عند واحد. ايلى كان شي حد خاصو يتابع هو اللي باع. دابا التحقيقات والوثائق اللي غادي يجيبها محامي المتابع غادية تحل المشكلة