شكون هو ولد لملايري اللي شدوه فميناء طنجة بسباب كسيدة فتطوان بطونوبيلة ثمنها 600 مليون؟ وكيفاش ضغوط كبيرة على النيابة العامة باش يطلقوه وعلاش ما جبدوش ليه قضية الجنس الجماعي فكازا

تشد ول البارح لاربعا فميناء طنجة المدينة ولد ملايري كبير مع صحابو. كلهم كانو غاديين لطريفة. السبب وفق ما نشرت يومية "الصباح" عندو علاقة بكسيدة وقعات فجر الاحد 14 غشت وسط المضيق وكان راكب على "لومبورگيني" ثمنها 600 مليون سنتيم.
دابا لحد الان تشدو 3 منهم ولد لملايري اللي هو ولد هيلا اللي ولى من اغنياء كازا بعد ما باع بوه گطارات كثيرة ضواحي كازا.
من المتوقع يتقدم هاد الصباح امام وكيل الملك بتطوان. هزوه من طنجة بعد ما وقفوه وداوه لتطوان اللي وقعات فيها لكسيدة.
كاينة روايات مختلفة. ولد لملايري كيقول باللي ما كانش فالطونوبيلة باش وقعات لكسيدة واخا هي طونوبيلتو. الرواية كتقول باللي ما كانش فالمغرب گاع. رواية اخرى كتقول باللي كان فيها هو شي بنت وباش وقعات لكسيدة جا شي صاحبو فبلاصتو وباللي هرب بعد الحادثة اللي تصابو فيها 3 كانو فالطاكسي. رواية اخرى كتقول باللي اللي كان فالطونوبيلة مع مراتو اسمو انس وانو جات طونوبيلة صاحبو من نوع "بي ام" وداتو وفالصباح رسل شيفور باش يقول هو اللي كان سايگ لومبورگيني.
وفق مصادر "كود" فان ولد هيلا باع الطونوبيلة وعندو وثائق تثبت هاد الشي وبقى التأمينات فاسمو ولكن خلى مسؤوليتو.
دابا التحقيقات اللي غادية توضح كلشي ايلى دارت بقواعدها. لانو من الاحد 14 غشت وضغوط كبيرة بزاف بزاف على القضاء وعلى البوليس باش تضمص القضية كيف سبق وضمصو ليه قضية "الجنس الجماعي" فدار فكازا. كان هو مجبود ومن بعد خرجوه منها وشدو شي صحابو وطلقو من بعد.
القضية كانت تكون بسيطة كون بقى اللي سايگ لومبورگيني فبلاصتو حتى جا البوليس لانو ما كانت خسائر بشرية٬ ولكن اولاد لملايرية كيعتابرو ريوسهم كلشي يشريوه بالفلوس.
دابا نشوفو باش غادي يخرج التحقيق واش غادي يقرر وكيل الملك. شفنا اش وقع فعين السبع بعد ما طاحت العصابة اللي فيها قضاة وسماسرية ورجال امن ورجال اعمال.... راه العين على تطوان دابا.