العطلة الوزارية زادت عقدات أزمة الطلبة اللي راجعين من حرب أوكرنيا..التنسيقية: كنلتمسو من الملك يتدخل لينا

غياب الحلول وضعف التواصل، زاد فالغموض حول مستقبل الطلبة العائدين من أوكرانيا بسبب الحرب، بحيث هاد الفئة مازال معارفش راسها من رجليها، خصوصا وأن اغلبهم كانو كيقراو فكليات الطب والصيدلة باوكرانيا.
تنسيقية الطلبة المغاربة بأوكرانيا، رجعات ونظمات احتجاجات اليوم، وطالبو بتسريع عملية الإدماج في الكليات المغربية العمومية والخاصة قبل حلول شهر شتنبر.
هاد الفئة لي تالفا بين تقبل حلول كتجيها صعيبة ولي من ضمنها اتمام الدراسة فدول مجاورة مع اوكرانيا، او تقبل دوز مباريات فالمغرب عادي يتقبلو يكملو قرايتهم هنا.
وحسب مصدر من التنسيقية فإن العطلة الوزارية زادت عقدات الامور، فاش ملقاوش الاسر ديال الطلبة المخاطب ديالهم فهاد الوقت الحساس، مما يعني ان الطلبة فقدو عام دراسي.
ودعت التنسيقية في بلاغ لها الحكومة، للكشف عن مآل الاتفاقيات مع دول الجوار الأوكراني، وتوضيح صيغة وشروط عقد الاتفاقية مع السفارة الأوكرانية بخصوص الدراسة عن بعد، وذلك لضمان متابعة دراسة جميع الطلبة دون التخلي عن أي واحد منهم.
التنسقية التمسات من الملك محمد السادس يتدخل فالموضوع وينصفهم .