عن تيل كيل: ولي العهد مولاي الحسن. التراب مول الفوسفاط خسر لملايين باش يجيب ليه لعاب كبير فكرة السلة اللي عزيزة عليه وما حضرش والكلية اللي كيقرا فيها تبنات فوقت قياسي

العدد اللي دارتو "تيل كيل" على ولي العهد مولاي الحسن فيه امور غريبة. ما نهدروش على هدرة كتكرر معاه وقبلو مع باباه وقبلو مع جدو: لقراية والالتزام والذكاء و..
عادي راه ولي العهد وتربى باش يكون ملك. ما نهدروش على اختيارو العلاقات الدولية فكلية الحكامة والعلوم الاقتصادية والاجتماعية اللي تابعة لجامعة محمد السادس متعددة الاختصاصات فرع سلا اللي تابعة بدورها لديال بنكرير.
ولي العهد كان قرا عام فبنگرير قبل ما يتحول لهادي ديال سلا. من الامور اللي جابها مقال "تيل كيل" هو ان هاد الفرع ديال سلا اللي تابع للمكتب الشريف للفوسفاط بحالو بحال ديال بنگرير٬ تبنى فوقت قياسي. قياسي بزاف.
خدم فهاد المشروع 3 شخص وكان كيتبنى ليل ونهار ووجد قبل وقتو وبزاف. فالدخول الجامعي لاكتوبر 2021 =2022 كان واجد.
كيفاش وبشحال طلع وشحال خسرات الفوسفاط ما جابتوش المجلة. هادي تجربة ممكن تكون مفيدة للمشاريع فالمغرب. كيفاش توجد مشروع كبير فزمن قياسي.
من الامور اللي جابتهم "تيل كيل" هو ان مصطفى التراب الرئيس المدير العام للمكتب الشريف للفوسفاط خسر فلوس كثيرة باش يدير مفاجأة لولي العهد ولكن فاللخر ما جاش.
حسب "تيل كيل"٬ التراب عرف ولي العهد عزيز عليه الباسكيط٬ جاب ليه توني كهدية فيها توقيعات للاعبي "لوس انجلوس ليكرز" الشهير. طبعا نجم ليكرز دجيمس براون كان حتى هو موقع.
هادي هدية صغيرة. التراب جاب ليه هدية اخرى غالية كثر فاواخر 2019. وجد ليه فرصة يتلاقى بنجم اخر لكرة السلة الامريكية وهو راي آلن= كان فسياتل ومن بعد داز لميلوكي وكملها مع "ميامي هيت". اللعاب المشهور جا لبنگرير فاطار شراكة بين المكتب الشريف للفوسفاط وبين البطولة الامريكية للمحترفين فكرة السلة "ان بي اي". واييه. قاليك بول كاگامي رئيس رواندا نصح بيها التراب.
المشكلة ان هاد الشي كولو دار وولي العهد ما جاش. التراب خسر فلوس كثيرة وفاللخر ما جاش ولي العهد. ما قالوش علاش. واش عندها علاقة بكورونا؟ ما عرفناش
فهاد الملف هدرو على عشق ولي العهد للباسكيط وللروك وكيعجبو يضرب الباتري وجبدو امور اخرى مرتبطة بالجوانب الامنية....
تفاصيل اكثر فعدد هاد السيمانا من تيل كيل