شوهة أخرى فتيران المحمدية وهاذ المرة قبل ماتش السوالم وبركان

كتواصل الغرائب والعجائب فالبطولة الوطنية فزمن الاحتراف، وبالضبط فتيران البشير فالمحمدية وهاذ المرة فماتش نهضة بركان وشباب السوالم المؤجل عن الجولة 6، اللي تعطل اليوم السبت قبل ما يبدا.
فمن بعدما طفا الضو البارح فتيران البشير ما بين شباب المحمدية والجيش الملكي وتوقف الماتش فاللاحظات الأخيرة ديالو قبل ما يسالي، اليوم مرة أخرى كان تيران البشير مسرح ديال حادث كوميدي وهادشي فماتش شباب السوالم ونهضة بركان.
وتعطلت المباراة ديال السوالم ونهضة بركان على الانطلاقة ديالها حيث وحدة من رايات الزوايا اللي كايكونو فالتيران ماكانوش فبلاصتهم، الأمر اللي جعل الحكم محمد بلوط حتى يركبو الريات، مع العلم أن المسؤول على تنظيم الماتش هو شباب السوالم حيث هو اللي مستقبل فتيران المحمدية.
وتسناو اللعابا حتى تم تركيب رايات الزوايا فالتيران، عاد علن الحكم على انطلاق الماتش ما بين شباب السوالم ونهضة بركان، مع العلم أن فحال هاذ الحوادث المتكرر كيفما وقع فتيران البشير فالمحمدية اللي مكانوش راكبين فيه الرايات اليوم وتقطع فيه الضو البارح راه ممكن يؤثرو على صورة الكرة المغربية خصوصا وأن المغرب دابا عندو مكانة وقيمة فتنظيم التظاهرات والأحداث الرياضية أفريقيا وحتى دوليا، ولكن الناس اللي مسؤولين على تسيير المرافق الرياضية وحتى الأندية خاصهم يكونو واعيين بهاذشي باش ميضربوش الخدمة اللي كتدير فيها الجامعة الملكية المغربية لكرة القدم فالزيرو.