المحامي كروط او باش كيخلط بين الاخلاق والقانون. راك محامي وبلادنا من 1912 ما كتعتارف الا بالقانون الوضعي وبلا ما تهدر انت على الامن الاخلاقي ولا على "اجماع لمغاربة" راه كذبة ودافع غير على موكلك اش دخلك للوزير

عبد اللطيف كروط محامي الصحافي تيجيني دار ندوة صحافية وقال كلام غريب. ندوة صحافية من المفروض ما يديرش لي مرافعة وخاوية. المفروض فكل محامي يركز على الدفاع على موكلو. هاد الموكل كيعتاقد ان فنان الراب الكبير والمعروف طوطو٬ اييه كبير ومعروف وفنان نيڤو طالع عندو٬ هددو. تصرف تصرف حضاري ومشى للقضاء. دابا هاد القضاء اللي غادي يحكم فهاد القضية.
لكن ندوة كروط اللي دارها باش يوضح تفاصيلها٬ خلط بين القانون وبين الاخلاق. ومع الدخلة بدا يهدر كلام عمومي ما كيعتارف بيه القانون. كيهدر على الكلام الساقط. على تكمي جوان على تنشوى بكاس. مشى بعيد وجبد. اييه كروط جبد٬ الامن الاخلاقي. تلف البيت الشعري اللي كيقول انما الامم الاخلاق ما بقيت. وقال "انما الامم اخلاقها" ماشي مشكل. ولكن اش دخل الاخلاق فقضية معروضة على القضاء.
مشى كيدعي ان ما وقع مس المجتمع ومس الكيان الاخلاقي ومس الكيان لاسلامي ومس الدين ومس الثقافة الرائجة" وزاد "لا اعتقد ان احدا من المجتمع قبل بذلك بل ربما ان هناك اجماع يرفض ما وقع". دابا واش هادا كلام القانون؟ بلا ما نهدرو على اسطورة الاجماع اللي ما عمرها وقعات. شكون انت اللي كتهدر باسم المجتمع؟ واش عندك شي شرعية معينة؟ واش عندك شي انتداب من المجتمع.
بلا ما تهدر انت على الاخلاق. ماشي قانونية بلادنا من 1912 ولى كيحكمنا القانون الوضعي ماشي الدين. فهاد القانون كيحتاكم للافعال ماشي للاقوال. انت ادرى بهاد الشي.
ما بغيتش نهدر عليك كشخص وما اثير على هاد الشخص. راه تكتب بزاف على القضية ومازال منشور. كنهدرو علي مهمتك كمحامي.
كاينة نقطة اخرى. انت كمحامي للصحافي التيجيني اش دار للمال العام. سوقك؟ بغيتي دير السياسة ولا المعارضة هبط للانتخابات ودخل للبرلمان. سوقك ان الوزير يدير حفل بمناسبة اختيار الرباط عاصمة للثقافة الافريقية؟ هادا قرار للدولة. اش دخلو فقضية معروضة امام القانون. غير باش تعرف كنظن ثقافتك الموسيقية ضعيفة بزاف. راه وزارة الثقافة اللي كنختالف معاها فتوجهاتها٬ اختارت المغني المناسب لهاد الحفل. طوطو اشهر فنان مغربي فالقارة الافريقية. اشهرهم على الاطلاق. عادي يبرمجوه. اللي ماشي مفهوم على مستوى البرمجة ماشي القانون هو برمجة سميرة بن سعيد ماشي طوطو.
طوطو من حقو يكمي لحشيش باش يغني. من حقو يشرب فسهرة. ماشي انت اللي تحدد اش يشوفو لمغاربة. تفرض الذوق اللي بغيتي. حتى حد فهاد لبلاد ما يقدر دابا يفرض على شعب اش يسمع اش يشوف غير تهنى.
ديها فدفاعك على موكلك وخلي عليك اخلاق لمغاربة. هاديك الفكرة الغبية ديال الامن الاخلاقي راها حتى السعودية حلات شرطة الاخلاق =الامر بالمعروف اللي كانو كيديرها المطاوع= بقات غير فايران وشوف اش واقع فيها دابا.