الماص لجمهورو: منع الديبلاصمون لطنجة قرار ديال السلطات ما عندنا فيه دخل

تبرأ المكتب المديري المغرب الفاسي من قرار منع المصاويين من ديبلاصمون لطنجة باش يتفرجو فماتش الماص ضد اتحاد طنجة اليوم الجمعة، فالجولة 7 من منافسات البطولة الاحترافية لكرة القدم.
وخرج المكتب المديري ديال المغرب الفاسي برئاسة اسماعيل الجامعي قبل لحظات فبلاغ للنادي، وقال بلي ما عندو دخل فالقرار اللي تم اتخاذو بخصوص منع التنقل الجماعي للجماهير نحو مدينة طنجة، واللي صادر عن السلطات الأمنية الوصية.
المغرب الفاسي أكد أن جمهور الماص عندو الحق يتنقل بشكل فردي لمتابعة الماتش، وتأسف لحرمان جمهور الماص من التنقل لطنجة باش يساند الفريق.
وكيجي خروج إدارة المغرب الفاسي على صمتها، من بعدما طالبها فصيل الفاطال تايكرز بالتدخل للدفاع على جمهور الفرقة باش يحضر ماتش الفريق.