سكوب. شبكة كبيرة لتبييض الأموال طاحت فمراكش: خيوط الشبكة وصلت نافذين كبار منهم صراف معروف والديوانة دخلت على الخط

علمت "كود" من مصدر مطلع أن عناصر الشرطة القضائية بمراكش، طيحت فهاد يومين شبكة كبيرة ديال تبييض الأموال ومنهم أشخاص متهمين بتكوين عصابة ديال النصب والسرقة.
حسب معلومات "كود" فإن عدد الأشخاص الذين تم توقيفهم، يبلغ 7 أشخاص، ضمنهم صراف معروف بمراكش، له علاقات نافذة مع "الملايرية" فالمدينة السياحية.
قصة الشبكة الخطيرة، وفق معطيات "كود"، بدأت عندما تعرض مهاجر مغربي، قبل يومين، لعملية السرقة من أمام محل لصرف العملات، يمتلكه شخص صديق وشريك لملايري معروف فمراكش، هاد الملايري هو مول المطعم والملهى الليلي ملاك المشهور. وهاد الملايري سبق كتبنا عليه ف "كود" مجموعة من الخروقات فالبناء ودخل ف حروب ضد رجال اعمال اخرين.
العصابة لي بغات تسرق المهاجر المغربي، ف مبلغ كبير بزاف، فشلت فالعملية بحيث أن المهاجر تمكن يلوح الصاكادو ديالو لداخل المحل، واتصل بالبوليس فيما بعد، لي تدخل ودار أبحاث.
مور التحريات لي دار البوليس، كتاشفو بلي هاد العصابة ساكنة ف فيلا ف بريستيجيا، وتمت مداهمة الفيلا يوم الخميس 19 نونبر الجاري.
المفاجأة أن البوليس لقاو الكاش ف الفيلا، والغريب واحد فيهم عندو ف الكونط 2 مليار و400 مليون سنتيم، فاش سولوه كيفاش درت ليهم، قاليهم صرفتهم ف مصرف حدا لاكار لي كيمتلكو نفس الشخص لي كان غادي يصرف للمهاجر المغرب. طبعا هاد الصراف تا هو معتقل لحد الآن.
خيطو الشبكة بدأت تظهر، الديوانة دخلت على الخط، حسب مصادر "كود"، رؤوس كبيرة غادي طيح فهاد الشبكة. وهاد الملف حسب مصادر "كود" عندو ابعاد كبيرة وبلي الى مشا التحقيق في أبعد تحقيق
وقال مصدر حقوقي بمراكش ل"كود" :"الملايير كاضيع على خزينة الدولة وهادشي كيخرب الاقتصاد لذلك من السلطات الضرب من حديد على من يساهم في تخريب الاقتصاد".
دبا البحث باقي مستمر، تفاصيل مثيرة غادي ترجع ليها "كود".
طبعا للتأكد من تفاصيل مثيرة توصلنا بها (لم ننشرها بعد)، ربطنا الاتصال بمصدر مسؤول، لكنه رفض الرد على اتصالاتنا.