المغرب ربح بلجيكا والركراكي تألق بكوتشينك عالمي فأحسن ماتش فالمونديال

ربح المنتخب الوطني المغربي أول ماتش له فكأس العالم قطر 2022، من بعدما انتصر على بلجيكا اليوم الأحد فالجولة الثانية فتيران "الثمامة" بنتيجة 2 لزيرو.
الشوط الأول ما بين المغرب وبلجيكا سالا تعادل زيرو لزيرو وماركا فيه حكيم زياش هدف ولكن الحكم حيدو من بعدما رجع "الفار حيث اللقطة دخل فيها غانم سايس اللي كان تسلل، مع العلم أن لكول ياسين بونو ما لعبش الماتش وخدا منير المحمدي بلاصتو فاخر لحظة.
وفالشوط الثاني قدر المنتخب الوطني المغربي يحسم الأمور، والكوتشينك ديال الناخب الوطني وليد الركراكي كان ورا الرباح، حيث خرج أشرف حكيمي ودخل يحيى عطية الله فليسر وجاب نصير مزراوي ليمن بلاصت حكيمي اللي خرج ودخل عبد الحميد الصبيري بلاصت سليم املاح، وفثاني كرة غادي يلمسها عطية الله جاب كوفرا خطيرة على مرمى بلجيكا وبعدا عليه بمسافة 30 متر، الركراكي دخل عبد الرزاق حمد الله بلاصت يوسف النصيري، وزكرياء أبو خلال بلاصت سفيان بوفال اللي ما عجبوش الحال حيث دار له تغيير، ولكن غير شد الصابيري لكوفرا اللي جاب عيطة الله ضربها نيشان للشبكة ديال بلجيكا فالدقيقة 73 ، والكول البليجيك كورتوا ما شد فيها والو وتماركا البيت وتهز التيران.
من بعدما ماركا المنتخب الوطني المغربي البيت رجعو اللعابا المغاربة اللور كيدافعو وبدات بلجيكا كتضغط على مرمى منير المحمدي، الشي اللي جعل الناخب الوطني وليد الركراكي يدير تغيير وخرج عز الدين أوناحي ودخل جواد ياميق باش يسد التغرات على البلجكيين، والمغاربة عتامدو على "الكوتر أتاك" وفكرة واعرة فاخر اللحظات، عطا حكيم زياش اسيست لابو خلال اللي شد الكرة ضربها نيشان لمرمى بلجيكا وماركا الثاني.
وبهاد الرباح صبح المنتخب الوطني المغربي كيتصدر الكروب 6 مؤقتا برصيد 4 ديال النقاط، وبلجيكا رجعات ثانية برصيد 3 النقاط فانتظار نتيجة ماتش كرواتيا وكندا اللي غادي يكون فيها التعادل مزيان للمغرب.