المنتخب المغربي راجع اليوم للتداريب باش يوجد لكندا

غادي يرجع المنتخب الوطني المغربي لأجواء التدريب من بعدما ربح البارح الأحد منتخب بلجيكا فالجولة الثانية من كأس العالم قطر 2022، بنتيجة 2 لزيرو الشي اللي خلاه يتصدر لكروب 6 مع كرواتيا.
ومن المنتظر يدير المنتخب الوطني المغربي حصة تدريبية جديدة اليوم، هي الأولى ليكيب ناسيونال من بعد الماتش ديال بلجيكا باش يبدا يحضر لكندا الخميس الجاي، وغادي يخصصها وليد الركراكي والطاقم التقني ديالو باش يحيد فيها لعيا من اللعابا، حيث غادي يقسمهم على 2، العناصر اللي لعبو الماتش غادي يديرو تمارين خفيفة والاحتياطيين واللي ما شاركوش غادي يتدربو بشكل عادي.
الحصة التدريبية ديال اليوم غادي تبدا مع الساعة 4 ونص ديال العشية بالتوقيت المغربي، وغادي تكون مهمة بالنسبة للطاقم التقني، وأيضا بالنسبة للطاقم الطبي ديال المنتخب بقيادة عبد الرزاق هيفتي، باش يعرفو الجاهزية ديال كل اللعابا وفمقدمتهم، أشرف حكيمي وحكيم زياش وياسين بونو حيث هاد الثلاثي عندو إصابات.