الوداد سالا مع عموتة وكل واحد شد طريق

قرر الوداد الرياضي والمدرب الحسين عموتة ينهيو العقد اللي بينهم بشكل ودي، وهادشي من بعدما رفض سعيد الناصيري يرجع المدرب المذكور يدرب الفرقة حيث خلاها هادي 2 سيمانات وسافر يحلل ماتشات المونديال فقطر.
وحسب مصدر مطلع، كان اليوم السبت، اجتماع ما بين مسؤولين فالوداد الرياضي والمدرب الحسين عموتة، وخرجو معه باتفاق على إنهاء العقد ديالو مع الفرق بشكل رضائي، مع العلم أنه تم التعاقد معه قبل حوالي 4 أشهر بطلب من جمهور الوداد.
وكان سعيد الناصيري رئيس الوداد الرياضي اتخذ القرار ديالو بالانفصال على المدرب الحسين عموتة قبل 3 أيام من دابا، حيث سافر لقطر والفرقة بقات بوحدها كتدرب، وملي سمع عموتة الخبر رجع للمغرب بسرعة ولكن كان الموقف ديال الوداد محسوم حيث رئيس النادي شاف تصرف المدرب المذكور ما مقبولش بفريق كبير بقيمة بطل المغرب وإفريقيا.