يوسف النصيري ضرب هاتريك مغربي فكأس ملك إسبانيا

نجح الدولي المغربي يوسف النصيري فقيادة الفريق ديالو إشبيلية الإسباني لتحقيق التأهل لدور 16 من كأس ملك إسبانيا من بعدما ربح فدور 32 فريق ليناريس ديبورتيفو اليوم الأربعاء، بنتجية 5 لزيرو ضرب فيها النصيري الهاتريك وأكد أن المستوى اللي ظهر به مع المنتخب الوطني المغربي فكأس العالم قطر 2022، ما جاش بالصدفة ولكن بالفعل بدا كيسترجع المستوى ديالو.
وربح إشبيلة فتحقيق الفوز بحصة 5 لزيرو، نجح يوسف النصيري فأنه يفتتح التسجيل للفريق الأندلسي بهدف ماركاه فالدقيقة 38، ورجع من بعد منها بمدة 2 دقائق وضرب الهدف الثاني فالدقيقة 40، وفالشوط الثاني سجل إشبيلية الهدف الثالث والرابع عن طريق كل من لوثيانو سكادرون لاعب ليناريس اللي ماركا على راسو فالدقيقة 57 وإيريك لاميلا اللي فالدقيقة 69، قبل ما يرجع يوسف النصيري ويضرب الهدف الثالث ديالو فالماتش والخامس للاندلسيين فالدقيقة 74.
وكيجي هاتريك يوسف النصيري مع إشبيلية فكأس ملك إسبانيا باش يزكي فالمستوى الكبير اللي قدم مع المنتخب الوطني المغربي خلال مونديال 2022، وساهم فبلوغ المنتخب الوطني المغربي نصف النهائي والحصول على المركز الرابع فالبطولة من بعدما سجل 2 أهداف على كل من كندا فالدور الأول والبرتغال فدور ربع النهائي.