تأهلت السنغال لثمن نهائي كأس العالم قطر 2022، اليوم الثلاثاء من بعدما ربحت الاكوادور بنتيجة 2 الأهداف لواحد فالجولة الثالثة من البطولة ودازت هي وهولندا للدور الثاني اللي حتى هي ربحت قطر هاد العشية. ونجحت السنغال فتسجيل الهدف الأول مع نهاية الشوط الأول من بيلانتي ماركاه وإسماعيلا سار، وفالشوط الثاني رجعت الإكوادور بالنتيجة وجابت التعادل وماركاه ليها مويسيس كايسيدو فالدقيقة 68، ولكن السنغاليين بقاو مركزين وضربو وراها هدف الرباح بجوج دقيق عن طريق كاليدو كوليبالي. وبهاد الرباح تأهلت السنغال للمرة الثانية فتاريخها لثمن نهائي كأس العالم، من بعد 20 عام ديال الغياب حيث كانت أول واخر مرة فمونديال 2002 مع أليو سيسي المدرب ديالها دابا وحاجي ديوف والجيل اللي كان معاهم. وبخصوص نفس لكروب دازت هولندا للدور الثاني حتى هي من بعدما ربحت قطر فنفس التوقيت بنتيجة 2 لزيرو، ماركاهم كودي جاكبو فالدقيقة 26 وديونك فالدقيقة 49. وتصدرت هولندا الترتيب النهائي ديال لكروب 1 برصيد 7 النقاط، والسنغال هي الثانية برصيد 6 النقاط، والكوادر الثالثة برصيد 3 النقاط والتقصات هي وقطر صاحبة المركز الأخير بصفر نقطة.
