كيفاش رئيس نادي كبير بحال الراجا يسب جمهورها العظيم ويعتاذر بحال ايلى ما كاين والو. هاجم قلعة خضرا "درب السلطان" وتكهم على الفقرا المجنونين بالخضرا وداز لكلشي بوقاحة: ساهمتي نكفو ما ساهمتيش سير تكمش

هاد ليام كنشوفو كيفاش تصريح قلل فيه رئيس الاتحاد الفرنسي لكرة القدم لحيا والاحترام على الاسطورة زين الدين زيدان خلاتو يتعزل فانتظار محاسبتو فقضايا اخرى واخا قدم اعتذارو.
البارح شفنا رئيس الرجاء البيضاوي البدراوي جا حتى هو لبرنامج اذاعي "بدون لغة الخشب" عند الرمضاني رضوان فاذاعة "ميد راديو" وسب هاد الجمهور العظيم للنادي الاخضر.
اليوم قال ليك كنعتاذر. اولا ماشي زلة لسان كيف قال. كذب مول الزبل اللي بغى يدير مجدو على هاد النادي لكبير.
سمعو اش قال ووقتاش. فاخر البرنامج كان كيهدر على الحلول اللي كيوجد كرئيس باش يخرج النادي من المشاكل المالية.
قال بالضبط "كاينة حلول ولكن راه الامتحان الصعيب هو اللي حطنا فيه الجمهور". وزاد وهو فكامل تركيزو وخاطب كاع جمهور الخضرا فالعالم "ساهمتي نفكو. ما ساهمتيش سير تكمش وخلينا نجيريو الفرقة اللي عندنا". تهديد وسب واحتقار للجمهور.
هو دار الصينية وكيهاجم الجمهور باش اما تساهم او تسكت.
قبل هاد الشي كان هاجم قلعة رجاوية تاريخية. هاجم فقرا درب السلطان اللي كيعشقو الخضرا. بدا كيقسم فالجمهور وكيقول باللي كاين "الكوربا" هي الجماهير الحقيقية وكاين "الجماهير الفايسبوكية" وجبد "اللي سارق الكونيكسيون اولاد درب السلطان وجالسين" كينتقادوه
وضرب جمهور اخر من الخضرا غيور على فرقتو باش اتاهمو باللي كيشوش وكيدخل ب"فو كونت"
هادا واش الاعتذار مقبول؟ الجماهير الرجاوية هي اللي عندها القرار طبعا. غير هو الاعتذار كون على سوء فهم ممكن ولكن راه هاجم الرجاويين اكثر من مرة
الحلقة كاملة