الفتح شمتو آسفي وربحوهم بهدف قاتل والرباط كتصدر البطولة

حقق فريق الفتح الرياضي رباح مهم فماتش مشوق أمام أولمبيك آسفي اليوم الاحد فتيران الأمير مولاي الحسن فالرباط بنتيجة 2 لواحد، ضمن الجولة 12 من منافسات البطولة الإحترافية لكرة القدم.
الشوط الأول سالا بين الفريقين بنتيجة التعادل السلبي زيرو لزيرو، وفالشوط الثاني كان أولمبيك آسفي السباق للتسجيل عن طريق محمد المرابط فالدقيقة 75، ومن بعدها بدقيقة رجع الفتح فالماتش وضرب التعادل بهدف ماركاه حمزة هنوري فالدقيقة 76، وفالوقت اللي كان كلش كيتسنا يسالي الماتش بالتعادل نجح فريق الفتح الرياضي فخط الرباح بهدف قاتل ماركاه مروان لوادني فالدقيقة 90، هادشي خلا اللاعبين ديال آسفي يحتجو على الحكم بداعي ارتكاب أحد لاعبي الفتح لخطأ فحق واحد من اللاعبين المسفيويين قبل ما يتماركي الهدف وكانت الاحتجاجات قوية مما اضطر الحكم لإشهار البطاقة الحمراء فوجه أسامة محروس لاعب آسفي.
وبهاد الرباح رجع الفتح الرياضي يتقاسم صدارة البطولة مع الجيش الملكي برصيد 25 نقطة، أما أولمبيك آسفي فتجمد الرصيد ديالو فالنقطة 19 وكيحتل المركز السابع.