فيديو.. وزير الفلاحة ل"كود": مشيت للسوق أول البارح وهاد الغلاء عابر وكولشي غايرجع كيفما كان وثمن اللحم طاح ب5 دراهم وغايزيد يهبط

سولنا محمد صديقي وزير الفلاحة والصيد البحري والتنمية القروية والمياه والغابات، واش مشا للسوق وشاف هاد الغلاء لي كيغوتو عليه لمغاربة وضرهم فالجيب، فكان الجواب ديالو :"مشيت ول البارح ، حنا عارفين الوضعية تلاقاو فيها عدة عوامل وفسرناها منها كاين اضطرابات في الطقس خصوصا هاد انخفاض الحرارة لي مكانتش قبل وأثرت في جني الخضر ".
وأضاف الصديقي، في جوابه على سؤال "كود"، اليوم، مثلا ماطيشا، شهر نونبر وأكتوبر كانت كادير 2 درهم حيث الحرارة طالعا والجني كاين بزاف، واليوم العكس الطقس بارد والجني مكاينش اما الانتاج كاين بحيث كاينا مساحة 400 هكتار كثر من العام لي فات، وهاد المرحلة عابرة بالنسبة للخضر حيث كاين انتقال من فصل الخريف والشتاء".
وأوضح المتحدث ل"كود" :"دبا البصلة اليابسة غادي تمشي وغاتجي الخضرة، اليوم جا كولشي مرة بسبب الاضطرابات وتزاد الثمن"، مشدد بلي تداعيات كورونا تسببت في اضطرابات فالقطيع.
وتابع :"عامين ونص مكانش تلقيح القطيع، ودبا التأثير بان فهاد السنوات، والعام لي فات باش نسرعو فالتلقيح كان الجفاف تعطل"، مؤكدا بلي "اشكالية الحليب تعالج، واللحوم فيها مشكل ظرفي بحيث الحلول لي عملت الحكومة ظرفيا، بحيث مشينا لاستيراد القطيع (الابقار..) وتحيدات الرسوم الجمركية".
وشدد الوزير بلي :"تبين من بعد بأن استيراد الابقار ضعيف لأن الاثمنة عالميا غاليا لذلك مشينا حيدنا رسوم القيمة المضافة باش نسرعو كثر فالاستيراد، ودبا الاثمنة مستقرة فهاد 4 الايام وغايكون انخفاض فالاسواق".
وقال الصديقي :"كذلك بالنسبة للأكباش، درنا نفس الاجراءات".