سكوب. ماطيشة باقا دايرا الگرون.. ومسؤول حكومي ل"كود": من هنا ل10 ايام عاد غايهبط ثمنها والسوق الوطنية محتاجة 650 طن يوميا باش يستاقر الثمن

كشف مسؤول حكومي ل"كود" أن المغرب صدر ما يناهز 35 ألف طن من الطماطم، منذ يناير إلى حدود الأيام الأخيرة، مضيفا بأن :"هاد الرقم كبير وماشي عادي وخصوصا وانه لقينا طماطم بواحد الجودة أقل من اللي كاتصدر قبل، تاهي مشا للتصدير".
وعكس ما صرح به الناطق الرسمي باسم الحكومة مصطفى بايتاس، يوم الخميس الماضي، اللي قال بلي "الاسعار ستنخفض خلال اليومين القادمين"، باقا ماطيشا اليوم دايرا 12 درهم فعدد من المدن، أوضح المسؤول الحكومي ل"كود" :"بلي ممكن ينخفض ثمنها من هنا ل10 ايام اذا استطعنا نوفر 650 طن يوميا للسوق الوطنية".
وأوضح المسؤول الحكومة ل"كود" :"دبا كاينا 500 طن يوميا كتمشي للسوق الوطنية، وخصها طللع ل650 طن يوميا باش الاثمنة ترجع للاستقرار"، مشيرا بلي هاد الشتا لي طاحت مهمة بزاف وغادي يتأخر شويا من قطف الطماطم.
وأردف المصدر نفسه :"فسوق انزكان، يوم الأحد كانت ماطيشا دايرا 6 دراهم، ويوم الاثنين 14 مارس الجاري 5.5 درهم"، وفي ظرف اسبوع غادي يبان المستوى العادي، انزكان هي الموزع حيث مثلا يلا وصلنا للثمن ديال الكيلو 3.5 درهم، وباحتساب مصاريف النقل 1.15 سنتيم، والوسيط فالتقسيط عندو درهم ونص، تقدر توصل بالتقسيط ب5 درهم، ولكن باش تباع فانزكان ب5 درهم وتوصل للرباط ب14 درهم ماشي معقول وهنا كنهضرو على وسطاء وكاين احتكار كنحاربوه".
وأضاف المسؤول الحكومي ل"كود" :"الانتاج عندنا جد مهم، ممون السوق هي اشتوكة ايت باها، بحيث 90 في المائة من تموين السوق الوطنية بماطيشا كتجي من تما".
وتابع :"لاحظنا من يناير إلى غاية الآن، صدرنا تقريبا 35 ألف طن للخارج، وهادشي ماشي عادي، كاين طلب عالمي والاثمنة ارتفعت، حتى الطمام لي عندها جودة مكتصدرش ولات كتصدر. طبعا تدخلنا وتبعنا هادشي مع فيدرالية البواكر والمهنيين باش نعالجو هادشي. فعلنا المراقبة عبر لونسا وعبر المؤسسة المستقلة للتصدير ".
وبخصوص منع تصدير بعض المواد الأساسية، قال المصدر نفسه ل"كود" :"كاين هادشي ومنعا حاليا بعض البقوليا خصوصا الحمص"، مضيفا "غادي نخليو كمية التصدير لي غادي تخلي المنتوج متوفر فالسوق الوطنية".