واش بصح الحكم الرابع فرح بهدف فوز الرجاء على التواركة وشكون عندو مصلحة فهادشي؟

انتشر واحد الفيديو من بعد نهاية ماتش الرجاء الرياضي واتحاد التواركة البارح الأربعاء، فالجولة 17 من الدوري الاحترافي المغربي لكرة القدم، كيظهر فيه الحكم الرابع للماتش وهو كيحتفل بالهدف الثاني ديال الرجاء على التواركة.
الفيديو تنتشر بشكل كبير على مواقع التواصل الاجتماعي بعد نهاية الماتش ما بين الرجاء والتواركة، خصوصا وأن التحكيم فالماتش خلق جدل كبير وهاد الفيديو اللي ظهر فيه الحكم الرابع ديال الماتش وهو مصطفى الكشاف هاز يديه وكأنه كيحتفل بهدف الرجاء الثاني على الفريق الرباطي، زادت من الاحتقان والجدل بين الجماهير.
ومن بعد البحث على مصدر الفيديو اللي هو موقع "هيسبورت" تبين أن الفيديو اللي منتشر ديال الحكم الرابع لماتش الرجاء والتواركة وكيظهر فيه هاز يديه هو مفبرك، والحقيقة كتبان فالفيديو الأصلي حيث الحكم مصطفى الكشاف ملي سجلو الرجاء الهدف الثاني واللحظة اللي هز فيها يديه، راه هز يديه باش يحبس دخول لاعبي الرجاء وأفراد الطاقم التقني للفريق إلى أرض الملعب للاحتفال بالهدف.
هذا الحادث اللي وقع لفيديو الحكم الرابع فماتش الرجاء والتواركة والاتهامات اللي نزلت على الحكم بأنه غير محايد، خلقت الكثير من التساؤلات على شكون عندو مصلحة فهادشي وإشعال الفتنة، خصوصا وأن جماهير فرق منافسة الرجاء خرجت كتحتج حتى هي كتطالب معاقبة الحكم بناء على الفيديو المفبرك، وهذا أمر كيزيد من الاحتقان بين الجماهير.