واش كيهضر باسم مؤسسة إمارة المؤمنين؟.. الشيخ بنحمزة كيحذر من الحداثة فمدونة الأسرة ودافع على زواج القاصرات لي كولشي باغي يجرمو ومنها وزارة العدل ومؤسسات الدولة

الشيخ بنحمزة رئيس المجلس العلمي بوجدة، داير حملة ضد توجه الحكومة بتعديل مدونة الأسرة بناءا على توجيهات من الملك. حملة ضد يكون أي توجه حداثي فهاد المدونة.
بنحمزة، باقي كيدافع على زواج القاصرات وكيبرر اجتهادات بعض القضاة، وقال فندوة الجمعة لي فاتت بوجدة :"لماذا نطعن في حكم القاضي الذي قدر عن خبرة أن مصلحة القاصر في الزواج".
هاد الكلام اللي عندو خلفية "رجعية" وكيردنا اللور ولسنوات مضت، خصوصا وأن الحل الوحيد المطروح عند الدولة لمحاربة ظاهرة زواج القاصرات هو التجريم، وهادشي قالو وزير العدل عبد اللطيف وهبي، مرارا وتكرارا، وشدد بلي كاينا تجارب كثيرة فهادشي منها مصر اللي ماشي بعيدة علينا.
بنحمزة، اللي كيحارب التصوف بالجهة الشرقية، باين كيقدم خدمات مجانية للإسلاميين، بحيث أن أول حزب تبنا كلامو بخصوص تعديل مدونة الأسرة وكذلك زواج القاصرات، هو حزب العدالة والتنمية، اللي نشر ليه مداخلة ديالو فالموقع الرسمي للحزب.
هادشي لي قال بنحمزة جاء ردا على عبد اللطيف وهبي، وزير العدل، لي سبق صرح بأنه "مع تجريم زواج القاصرات ومع إلغاء الإذن لي كيصدر القاضي باش يزوج القاصرات".
وهبي كايقول "زواج القاصرات يعني البنت غاتعاني صحيا ومغاديش تمشي المدرسة"، مشددا بأن تجريم زواج القاصرات هو لي غادي يقضي على هاد الآفة.
موقف التجريم ديال هاد الزواج مهم بزاف، ومزيان يكون فمشروع القانون الجنائي الجديد، وذلك بعدما رجعت هاد الظاهرة للواقع المغربي بحيث تزادو حالات زواج القاصرات ف2021 ووصلات ل19 ألف حالة زواج.
بلاصت بنحمزة يقاد المشهد الديني بوجدة، لللي عرفات بعض الخرجات الغريبة لمؤسسة المجلس العلمي، كيتحول لمناصر للإسلاميين بطريقتو.
مؤخرا، عضو المجلس العلمي بوجدة، دار خطبة جمعة، لي كيهضر على الفايد وكيرد عليه.
النقاش بين سلفيين متطرفين والفايد، كان خدا مسار فوسائل التواصل الاجتماعي، فاش الفايد تبدل وعاق بلي هاد المنهج السلفي ضد العلم وقال بلي هاد الشيوخ ماشي علماء وكاين لي فيهم مكيعرفش حتى اللغة العربية. هادشي قسم المتتبعين بين جوج أطياف، طيف كيدعم الفايد لأنه عاق وفاق، وطايف باقي مقلوبة عليه الكفة وكيدعم دوك السلفيين المتطرفين.
الغريب هو أن مؤسسة المجلس العلمي بوجدة لي كيترأسها بنحمزة، دخل فهاد الحرب، رغم أن مؤسسة المجلس العلمي بعيدة على هادشي، وهادشي فيه اقحام لمؤسسة كيترأسها الملك بصفتو أمير المؤمنين في صراع بين الفايد وشيوخ السلفية بالمغرب.