كيفاش وهبي ونزار بركة تخلاو على رئيس حكومتهم ومدافعوش عليه فهاد الحملة ديال الاستهداف الغريبة وبرلمانيين من البام والاستقلال كيروجو لحملة "اخنوش ارحل"

التحالف الثلاثي كان خطأ، تحالف قسري ومكانش فصالح البلاد، كتبنا هادشي ف"كود" قبل وهادشي تبين فالجهات وفالبرلمان والمجالس المنتخبة وحتى فالحكومة وشفنا وزراء البام كيحفرو لوزراء الاحرار، ودافعنا يكون الاتحاد الاشتراكي فالتحالف والبام بمشي للمعارضة.
مصادر برلمانية هضرات "كود"، كولشي عارف هاد التحالف غير منسجم وشي كيحفر لشي، وأول امتحان بانت هاد الاغلبية عاجزة فالدفاع عن مؤسسة رئاسة الحكومة.
شفنا مطالب "اخنوش ارحل" روجوها صفقات فايسبوكية جديدة ونشطاء البوز اللي معروفين كيروجو الفايك نيوز والكذوب (طبعا مستعدين ف كود نقولو ليهم فين نشرو الكذوب سواء فهادشي ديال الاسعار وغيرها).
طبعا فحملة اخنوش ارحل، شفنا اعمدة الاغلبية (البام والاستقلال)، عبد اللطيف وهبي ونزار بركة ساكتين، ضاربين طم.
الغريب هادو كيروجو بلي حكومتهم متجانسة وكيدافعو على بعضياتهم. ولكن فالامتحان الكبير تخلاو على رئيسهم للي قرر يتحالف معهم.فاخير جلسة قبل ما تسد دورة اكتوبر فالبرلمان، اخنوش رفض هجوم المعارضة على وهبي ودافع عليه بشدة، وقال :"ما عمرني ندخل لهاد الخطابات الشعبية، وهاد الحكومة معندهاش الوقت والجهد لتضييع زمن المغاربة في المزايدات الخاوية وصعيب تلقا اغلبية منسجمة فحال اليوم، وسي وهبي مشكور رجل دولة وسي نزار مشكور رجل دولة ".
هاد الدفاع لي دار اخنوش على وهبي ونزار، كان دليل على أن رئيس الحكومة متمسك بأغلبيته وكيدافع عليها، فالمقابل وهبي ونزار بركة مدارو تا شي خطوة لصالح هاد التحالف فوقت المحنة.
الغريب اكثر كتلقا برلمانيين وقياديين فهاد جوج احزاب (الاستقلال والبام) كيروجو فيديوهات فمواقع تواصل اجتماعي ضد اخنوش. هذا ماشي تحالف ثلاثي، هذا تحالف ثنائي ضد اخنوش وسط الحكومة.
قيادي فالبام دار حوار مع شي جريدة وانتقد الحكومة بشدة، وهاد الحزب دار مؤخرا بيان انتقد فيه الحكومة فقطاع الفلاحة، وطالب بتدابير واجراءات استعجالية، هادشي قبل ما يخرج بلاغ الديوان الملكي لي فيه اجراءات استثنائية لدعم الفلاحين.