ماتش واعر للمغاربة فلاليكا.. النصيري ماركا لإشبيلية والزلزولي ضربها على بونو وربح أوساسونا

نجح الدولي المغربي عبد الصمد الزلزولي فخطف الرباح لفريقو أوساسونا فديربي الأندلس أمام إشبيلية، اللي كيلعبو فيها المغربيين ياسين بونو ويوسف النصيري، وهادشي اليوم الأحد فالجولة 23 من بطولة إسبانيا.
وسالا الماتش ما بين إشبيلية و أوساسونا بنتيجة 3 مقابل 2 لمصلحة الأخير، وكانت حاضرة البصمة المغربية فالمباراة بقوة وفالأهداف اللي تماركاو.
أوساسونا هو الأول اللي سجل بواسطة دافيد كارسيا، وجابو إشبيلية التعادل بواسطة نيمانيا كوديل، والهدف الثاني ديال أوساسونا تسجل من بعد خطأ ديال لكول المغربي ياسين بونو اللي تهز يضرب الكرة ببونيا ولكن زلقت له وضربت فصاحبو وتماركات.
النجم المغربي يوسف النصيري قدر يجيب التعادل لإشبيلية بهدف واعر من بعدما تلاعب بدافع أوساسونا وضرب الكرة للشبكة، لكن فاللاحظات الأخيرة قدر المغربي الآخر عبد الصمد الزلزولي يخطف واحد الكرة ضربها نيشان للشبكة ديال ياسين بونو وعطى الرباح لأوساسونا.
هذه الخسارة جمدة رصيد إشبيلية ف 25 نقطة وكيحتل الفريق المركز 14، أما أوساسونا عززو بهذا الرباح رصيدهم اللي وصل إلى 33 نقطة وكيحتلو المركز 7.