خاص.. إهانة والي فاس للبرلمان: رؤساء فرق الأغلبية بمجلس النواب كاعيين وغايديرو اجتماع لرد الاعتبار للنائب اللبار

الإهانة لي دار والي جهة فاس للبرلماني عزيز اللبار، فاش منعو من حضور لقاء خاص بالاستثمار في فندق بفاس، قلق بزاف مكونات مجلس النواب. بحيث كيستعدو رؤساء الفرق الأغلبية باش يديرو اجتماع خاص بهاد الإهانة اللي تعرض لها أحد أبرز النواب المعروف بحضوره الدائم في اللجان ومرافعاته القوية في مواضيع تتعلق بالاستثمار والمالية والأبناك.
وأوضح مصدر مقرب من هيئة الأغلبية البرلمانية ل"كود": "بلي ميمكنش نقبلو هادشي، التصرف لي دار والي فاس"، مؤكدا: "غانترافعو باش مكتب مجلس النواب يديرو موقف واضح من هاد التصرف".
وبغض النظر عن أسباب منع البرلماني اللبار، واحد العدد من نواب الأمة كيستغربو من هاد المنع، وهاد البرلمانيين لي هضرات معهم "كود" قالو كاملين بلي هادشي كيمسهم وكيمس سمعتهم ومكانتهم الاعتبارية، واللي عندهم الصفة ديال مراقبة السياسات العمومية ومساءلتها.
هاد المنع إهانة للبرلمان، وهادشي خلا نواب من الأغلبية والمعارضة يحتجو على هاد الفعل.
قيادي بارز فالبام اعتبر هاد الفعل غير مقبول وتجاوز لأخلاقيات المسؤولية الاعتبارية للولاة، ودبا خاص الولاة يسهلو انتقال سلسل لصلاحيات المراكز الجهوية للاستثمار منهم لوزارة الجزولي.