الرئيس الفرنساوي كان قال ان العلاقة ديالو مع سيدنا اميكال.. المغرب رد على ماكرون وكذبو: علاقاتنا مامزيانة ما اميكال وعيينا من "التحرش القضائي" ديال فرنسا

الرئيس الفرنسي إيمانويل ماكرون ، كان قال خلال مؤتمر فالايليزي هضر فيه على استراتيجيتو فإفريقيا انه باغي يطور العلاقات مع المغرب، وزاد ان العلاقات الشخصية بينو وبين الملك محمد السادس اميكال وودية.
ولكن الرباط كذبات هادشي، ومصدر حكومي رسمي قال ل"جون افريك" ان العلاقات مامزيانة ما اميكال، لا مابين الحكومتين لا مابين سيدنا وماكرون.
وحسب ذات المصدر، الرئيس الفرنسي نسى بزاف ديال النقط اللي جابدين الصدع بين باريس والرباط، من غير لافير "بيگاسوس" وتصويت فرنسا ضد بلادنا فالبرلمان الاوروبي. ومن بين هاد النقط، هضر المصدر على عدد الڤيزات اللي كاديليڤرا للمغاربة، الحملات الاعلامية ضد المغرب و"التحرش القضائي".
شنو كيعني المصدر ب"التحرش القضائي"؟ واش كيمعني على قضية الدولي المغربي اشرف حكيمي؟ اللي قرر المدعي العام يحقق فاتهامات بالاغتصاب توجهات ليه واخا السيدة رفضات تقدم شكاية؟ ماعارفينش، حيت ماحددش، خلا داكشي مبهم...