ها شنو واقع فقضية الأخوين ريان وسامي مايي وعلاش بعدهم الركراكي من المنتخب

اكد الناخب الوطني وليد الركراكي أنه ما عندو حتى مشكل مع الأخوين ريان وسامي مايي، وأن المنتخب الوطني المغربي ديال الجميع والباب مفتوح للجميع بشرط يكون لاعب يستحق بلاصتو فليكيب ناسيونال.
وأوضح وليد الركراكي خلال الندوة الصحافي اللي اعلن من خلالها على لائحة المنتخب المغربي لمواجهة البرازيل والبيرو: "ماعندي حتى مشكل مع ريان وسامي مايي، وحتى هما ما عندهم حتى مشكل معيا لائحة المنتخب المغربي مفتوحة أمام الجميع فالمستقبل بشرط أن مستوى اللاعبين اللي كتوجه لهم الدعوة يكون فالمستوى ديال ليكيب ناسيونال، وأنا راه ماشي مطالب باش نعيط لكل لاعب ونشرح له علاش ما قمتش بالاختيار ديالو".
وأكد وليد الركراكي: "هذا راه الفوتبول انا كندير لا ليست ديالي وكنعيط نشوف المصابين وراه كان ريان وسامي مايي فاللائحة الأولية وهذا دليل بلي ما عندي معهما حتى مشكل، يخدمو على ريوسهم والمستقبل جاي ويقدرو يرجعو للمنتخب بحالهم بحال بزاف ديال اللاعبين واي واحد خاصو يعرف يختار فين الفريق يلعب فيه ويختار مزيان كيفاش يمشي فالكاريير ديالو ويخدم ومرحبا به".