خاص. تصريحات ميارة رونات الأغلبية.. قيادي فالبام ل"كود": هادشي مرفوض وغير مقبول.. وقيادي فالاحرار ل"گود": هادشي داخل ف"ياكلو الغلة ويسبو الملة".. ومصدر استقلالي: ميارة ماتشاورش مع امينو العام بركة وماحترموش

تصريحات النعم ميارة رئيس مجلس المستشارين ضد الحكومة، الاحد لي فات فلقاء ديال النقابة، زعزع الاغلبية ودار قلق كبير وسط قياداتها، فحسب مصدر "گود" فإن نزار بركة الامين العام لحزب الاستقلال مقادرش يتحكم فالحزب ولا يحبس ميارة عند حدو، لذلك جات هاد التصريحات اللي قلقات مسؤولي التحالف الحكومي.
قيادي بارز فالبام قال ل"گود" هاد التصريحات لي دار ميارة مرفوضة وميمكمش نقبلوها فسياق مجهودات كبيرة كيديرها التحالف الحكومي.
مصدر اخر استقلالي تعجب من هاد الخرجة وقال بأنه ماشي بايعاز من اللجنة التنفيذية للحزب والامين العام بركة تفاجأ بها، بحيث ان ميارة متشاورش معه ولا نسق معه قبل ما يدير هاد الهجوم على الحكومة، اللي كيفكر فنفس القضية لي طرات مع هشام المهاجري.
قيادي فالاحرار وصف هادشي لي دار ميارة بانه كيدخل فسياسة "ناكلو الغلة ونسبو الملة".
قيادي ثاني فحزب الاحرار اوضح ل"گود" بلي الاغلبية كاملة رافضا هاد السلوك لي دار ميارة، مشددا بلي الاغلبية متابعة مزيان الشارع ومشاكل الاسعار وكتنبه في نفس الحكومة بضرورة اتخاذ الاجراءات اللازمة لايقاف نزيف الغلاء.
يشار بلي حزب حمدي ولد الرشيد محيح هاد الايام على الحكومة، رجل فالاغلبية ورجل فالمعارضة، بحيث فسابقة من نوعها تحول النعم ميارة، الكاتب العام للاتحاد العام للشغالين بالمغرب، ورئيس مجلس المستشارين، اللي عاطيها للسفريات للخارج، الى مناضل ثوري ضد غلاء الاسعار.
هاد الهجوم جاء قبل ايام عن اللقاء المزمع ديرو هيئة الاغلبية برئاسة عزيز اخنوش.
ميارة اللي ميمكنش يتحرك ولا يصرح خارج الدائرة للي كيحددها لي ولد الرشيد، قال فنشاط نقابي بإن "الموس وصل لعظم"، عند المغاربة، وبأن حتى واحد ميقدرش يتحمل ي ارتفاع أسعار المواد الاستهلاكية الأساسية.
ميارة لي لبس كاسكيط النقابي استغرب من تحكم الشناقة والمضاربين في الأسواق.
واضاف ميارة "من العار أن يبيع الفلاح منتوجه من الخضر بدرهمين للكيلوغرام، ويصل إلى المواطن ب 12 درهما"، وبلي خاص هادو يتعاقبو بالحبس.