مضاربة كبيرة بين مؤسسات الدولة. بنك المغرب سحب بلاغ رفع الفائدة والحليمي كيكذب الجواهري: التضخم طالع بزاف وفايت 10 فالمائة

بنك المغرب خرج لبارح بلاغ كيقول فيه بلي قرر رفع نسبة الفائدة ل3 في المائة وعطا ارقام على الوضعية المالية للبلاد خصوصا التضخم، ولكن من بعد بساعات قليلة سحب البلاغ، ماشي غير هكاك حتى لاماب سحبت القصاصة ديالها حول الموضوع.
المارشي فالمغرب دبا التقط قرار 3 فالمائة، وكولشي تالف والابناك تالفين. واش تسحب القرار او غير البلاغ لي تسحب. هادشي مافيهش اللعب. هذا مصير بلاد وشركات وابناك واقتصاد دولة، خاص الجواهري يخرج ويشرح شنو طرا.
بنك المغرب البارح 22 مارس خرج ببلاغ كيقول بلي نسبة التضخم هاد العام غاتوصل ل5.5 في المائة، ولكن في نفس النهار كيخرج بلاغ المندوبية السامية للتخطيط لي كيترأسها احمد الحليمي كيقول بلي معدل التضخم وصل ل10,1 في المائة في فبراير الماضي، بسبب تزايد أثمان المواد الغذائية ب 20,1 في المائة، وأثمان المواد غير الغذائية بنسبة 3,6 في المائة
وأفاد بنك المغرب في بلاغ صحافي عقب اجتماع مجلسه اليوم الثلاثاء، أن التضخم بلغ العام الماضي 6.6 في المائة، وهو أعلى نسبة مسجلة منذ 1992 في المملكة.
الارقام لي عطات المندوبية السامية للتخطيط كتكذب ارقام بنك الارقام. مندوبية الحليمي كتقول بلي الوضع خطير بالارقام لي عطات. الاسعار طلعات بزاف كثر من القياس.
فهادشي كامل لي واقع، واش مهمة الجواهري قريبة تسالي؟ كيفاش هاد التخبط فتدبير الوضعية المالية للبلاد. سحب بلاغ ديال رفع الفائدة فهاد الظرفية الصعبة لي كيعيش الاقتصاد الوطني كيزيد يضر بصورة المغرب الاقتصادية.