الفطور في سوفيتيل.. الاستقلال اللي مراضيش بالحكومة وكيضربها بميارة غايتلاقاو قبل اجتماع الأغلبية ومصدر من التحالف الثلاثي ل"كود": ميارة يلا معجباتوش الحكومة يخرج منها

الاستقلال، حزب كيكوي ويبخ، رجل فالمعارضة ورجل فالأغلبية، علن اليوم جميع أعضاء فريقه البرلماني باش يجيو نهار الخميس 13 أبريل، لسوفيتيل باش يفطرو فيه، قبل مايمشيو للقاء الأغلبية للي كيجي قبل نهار من افتتاح دورة أبريل فالبرلمان.
مصدر استقلالي هضر مع "كود" قال بأن قيادة الحزب مراضياش على الحكومة وتدبيرها لأزمة الأسعار وغياب التنسيق بيناتهم، مضيفا بلي: "عدد من اللقاءات الحزبية داروها البرلمانيين كلها انتقادات للحكومة".
وبخصوص التصريحات التي أدلى بها رئيس مجلس المستشارين النعم ميارة، في لقاء نقابي، أوضح ذات المصدر ل"كود": "تصريحات سياسية، والترويج بلي هادشي كلام نقابي وفلقاء نقابي محاولة للتمويه على الأغلبية"، مضيفا: "الأسعار بدات فالارتفاع شحال هادي والنقابي ميارة ساكت، علاش حتى لدابا عاد بانو ليه الأسعار".
مصدر في الأغلبية قال ل"كود": "راه الشجاعة السياسية هي تخرج من الحكومة يلا معجباتكش، راه تصريحات ميارة خطيرة ولكن حنا تفهمنا الوضع التنظيمي ديال حزبو وديال نقابتو، عارفين الصداع الداخلي لي عندهم وراه مايمكنش يتعالج بالهجوم على الحكومة".
وشدد ذات المصدر، بأن لقاء الأغلبية المقبلة غايعرف حضور رؤساء الفرق البرلمانية وبعض الوزراء المنتمين لأحزاب التحالف الحكومي (الأحرار، البام والاستقلال).