الميريكان في زمن كورزنا

الصراحة مفاجأة السهرة ديال كورونا هي الميريكان !! ترامب رجع كيبالينا بحال شي رئيس جماعة .. من غير داك جوج كلمات لي كيخرج يتعاير بيهم مع الصحافة السيد معندو ميتقال فعلا .. المواطنين الأميريكان ضاربين الصف على المساعدات الغذائية، بحال يلا البلاد ديجا ضاربة واحد عشر سنين فالحرب الأهلية .. الفرمليات فمستشفيات نيويورك لابسين الميكة ديال الزبل ، حيت الالبسة الواقية غير متوفرة وهذا ما لم يحدث حتى فسبيطار ديال دار الضو بالقصر الكبير أيام صدام حسين وقشبال وزروال !! المقابر الجماعية التي حفرها السجناء الأمريكان بالجرافات تعطيك انطباع أن الولايات المتحدة تعرضت لهجوم نووي غادر !! قارة على كدها فوق منها أكبر “قوة” فالعالم، مقدراش حتى تدفن القتلى بطريقة كريمة وانسانية ،في أراضيها المشمسة الشاسعة المليئة بحقول الماييس! داروهم فحفرة مجموعين وكبو عليهم القشرة الأرضية ومشاو يديرو القيلولة فبريزون بيريك .. أزمة التوابيت في نيويورك جعلت الثلاجات والكاميونات المبردة ممتلئة عن آخرها برائحة الكوفيد.. معرفت فين دارو داك الخشب لي سارقينو من العالم كامل ، حتى مباقا ليهم باش يصايبو التوابيت.. الرئيس الأمريكي بطلعته البرتقالية زاد كفسها وخرج للصحافة وقاليهم، منظمة الصحة العالمية ضحكات علينا، وحصلاتنا فالفيروس ديال الشينوا !! فجأة الميريكان رجعو تا هي كيضحكو عليها المنظمات ..فجأة اختفت السينما واختفى خاي طوم كروز وهو يبحث عن الدواء فميسيون آنبوسيبل .. فجأة دوك التلفازات ديال النازا ومراقبة المسابير الفضائية، زدقو غا بحال هادوك لي عند مول التلافز فسوق “كاساباراطا ” كينقلو فيهم فيصل القاسم ، ودوك المختبرات لي كيوريوهم لينا فالبرامج الوثائقية ديال ما وراء العلم والمستقبل والكواكب تاهوما زدقو مكيداويوش تا بوحمرون والرواح ..وبصراحة اذا بقات الميريكان بحال هكدا ..يا غتزحف عليها قوات حفتر من الشرق! يا غنعطيو للعثماني يصيفطليهم عبيابة، ويديرو شي حكومة كفاءات تصريف الاعمال!!
الحاصول…
عطيوني_عبيابة_ورجعو_انتوما_للور